د پېښو پر وړاندې د چمتووالي ملي ادارې سرپرست د جاپان هیواد له سفیر سره وکتل او اړمنو ته د رسېدنې په اړه یې خبرې وکړې
![news image](/sites/default/files/2024-07/whatsapp_image_2024-07-25_at_3.47.29_pm.jpeg)
کابل- د محرم الحرام ۱۹-۱۴۴۶/ د زمري ۴-۱۴۰۳
محترم الحاج ملا نورالدین ترابي د پېښو پر وړاندې د چمتووالي ملي ادارې سرپرست، نن سهار د خپل کار په دفتر کې په کابل کې مېشت د جاپان هیواد له سفیر کورمیاتاکایوشي سره وکتل او په داخل او بهر کې د ظرفیت لوړولو پروګرامونو پلي کولو، په اداره کې د اړتیا وړ وسایلو، په اضطراري حالاتو کې د پېښو مدیریت لپاره د رضاکارانو پر طرحې جوړولو او اړمنو ته د رسېدنې په اړه خبرې وکړې.
په دې کتنه کې د پېښو پر وړاندې د چمتووالي ملي ادارې سرپرست، د جاپان هیواد سفیر ته د ښه راغلاست ترڅنګ د هغوۍ له بشري مرستو مننه وکړه، او د دفتري وسایلو، د ظرفیت لوړولو پروګرامونو پلي کولو، ورکشاپونو او د دې ادارې د کارکونکو لپاره د پېښو مدیریت په برخه کې د تجربو شریکولو غوښتنه وکړه.
ورته مهال، په کابل کې د جاپان سفیر د افغانستان له خلکو سره د جاپان د خلکو د دوستي په اړه په خبرو سره ووېل: د جاپان خلک د افغانستان له خلکو سره هر ډول مرستو ته چمتو دي.
ښاغلي تاکایوشي روزنیز پروګرامونه له اساسي پروژو څخه وبلل او د پېښو پر وړاندې د چمتووالي ملي ادارې د کارکونکو لپاره د روزنیزو پروګرامونو برابرولو او د دفتر اړتیا وړ وسایلو ورکولو ژمنه یې وکړه.
همدارنګه د پېښو پر وړاندې د چمتووالي ملي ادارې, د جاپان د JICA موسسې او د ترکیه هیواد د ټیکا موسسې ترمنځ په همکاري او همغږي, د یادې ادارې د کارکونکو لپاره د ظرفیت لوړولو پروګرامونو پر پلي کولو هم خبرې وشوې.
په پای کې د پېښو پر وړاندې د چمتووالي ملي ادارې سرپرست، پر دوه اړخیزې همغږي او تفاهم ټینګار وکړ او د متقابلې همکاري ژمنه یې وکړه.
![news image](/sites/default/files/inline-images/WhatsApp%20Image%202024-07-25%20at%202.49.39%20PM.jpeg)