د پېښو سره د مبارزې ولایتي ریاستونو سره د ویډیویي غونډې ترسره کېدل
کابل – د کب ۳مه-۱۴۰۰
پېښو ته د رسېدو په چارو کې د دولت وزارت، د محترم مولوي شرف الدین مسلم د پېښو ته د رسېدو په چارو کې د دولت وزارت مرستیال په مشرۍ د دغه وزارت د رییسانو، آمرینو او د ولایتي رییسانو مسوولینو په ګډون د ویډیو کنفرانس له لارې په ژمي کې د احتمالي پېښو او سیلابونو ته د رسېدو او د خطرونو د کموالي په پار د لازمو تدابیرو نیولو په اړه حضوري او په آنلاین بڼه غونډه ترسره کړه.
د پېښو ته د رسېدو په چارو کې د دولت وزارت مرستیال د معلوماتي ټکنالوژۍ له آمریت څخه په آنلاین بڼه د پروګرامونو د ترسره کولو په پار د مننې ترڅنګ د پېښو له امله وروستیو بېځایه شویو، مستحقینو او زیانمن شویو ته د رسېدنې په ستایلو سره ټولو ولایتي رییسانو ته د احتمالي پېښو ته د رسېدو او مخنیوي په پار د لازمو تدابیرو د نیولو سپارښتنه وکړه.
ښاغلي مسلم د ملي او نړیوالو موسسو سره د مرستو ترلاسه کولو لپاره د اړیکو پر ټینګولو ټینګار وکړ او زیاته یې کړه چې دغه مرستې باید په شفافه او عادلانه توګه زیانمنو ته ووېشل شي.
ورپسې د پېښو سره مبارزې ولایتي رییسانو په وروستیو پېښو، شته امکاناتو او زیانمنو ته د رسېدنې په اړه خبرې وکړې او خپل وړاندیزونه یې د پېښو ته درسېدو په چارو کې د دولت وزارت له مشرتابه سره شریک کړل.
په پاې کې مولوي شرف الدین مسلم د پېښو ته د رسېدو په چارو کې د دولت وزارت مرستیال د غونډې په راټولو سره له موسسو سره په همکاري او همغږۍ، مرکز ته د وروستیو دریو میاشتو راپور او د ۱۴۰۱ کال د پلان او د معلوماتو په شریکولو باندې د ټینګار سربېره مسوولینو ته لازمې سپارښتنې وکړې.
