پېښو ته د رسېدو په چارو کې د دولت وزارت مرستیال او زلزلې ځپلو ته د مرستو د تنظیم کمېسیون سرپرست د وروستۍ زلزلې له امله زیانمن شویو سره د مرستې لپاره کونړ ولایت ته ورسېد
کونړ- د وږي ۱۵مه-۱۴۰۱
محترم مولوي شرف الدین مسلم، پېښو ته د رسېدو په چارو کې د دولت وزارت مرستیال او زلزلې ځپلو ته د رسېدنې او د مرستو د تنظیم کمېسیون سرپرست، تېره ورځ مازیګر، د وروستۍ زلزلې ځپلو ته د رسېدنې لپاره د کونړ ولایت نورګل ولسوالۍ دره مزار ته سفر وکړ.
مولوي شرف الدین مسلم، پداسې حال کې چې د زیانمن شویو سیمو څخه یې لیدنه کوله ویې ویل: دا ناورینونه چې د خداۍ ج له لوري نازل شوي یوه آزموینه ده او موږ باید د دې پر وړاندې صبر ولرو او خدای ج ته مراجعه وکړو، هغه وویل چې د دوو شپو وړاندې زلزلې له کبله زموږ یو شمېر هیوادوال شهیدان، یو شمېر نور هم ټپیان او کورونه یې ویجاړ شوي دي چې د افغانستان اسلامي امارت دې ته هوډمن دې چې د دغه هیواد مظلوم ولس لاسنیوې وکړي او موږ نن دلته د دې ولسوالۍ زیانمن شویو د بېړنیو اړتیاوو ته د رسېدو لپاره راغلي یو.
د دې وزارت مرستیال ووېل اوس مهال د هر شهید ورثه ته ۱۰۰ سل زره افغانۍ او ټپیانو ته د دې ترڅنګ چې ننګرهار او کابل ته یې د درملنې لپاره لېږو هغوۍ ته نغدي پيسې هم وېشو. نوموړي همدارنګه زیاته کړه، د دې ترڅنګ چې زیانمن شویو ته خوراکي او غیرخوراکي مرستې چې اوړه، وریجې، غوړي، خیمې، کمپلې، ترپالونه او د اوبو سطل په کې شامل وېشل کېږي او د نړیوالو مرستندویه موسسو سره هم د وروستیو زلزلو او سیلابونو له امله زیانمن شویو ته د بشري مرستو لپاره خبرې شوي دي.
ورته مهال د دغو مرستو ترلاسه کونکو پېښو ته د رسېدو په چارو کې د دولت وزارت مرستیال د شتون او د دې وزارت لخوا په وخت سره د مرستو رسولو لپاره مننه وکړه او د خوښۍ احساس یې وکړ.
