پېښو ته د رسېدو په چارو کې د دولت وزارت سرپرست او د یاد وزارت د مرستیالۍ سرپرست معرفي شول
کابل – 21 قوس 1400 / 7 جمادیالاول 1443
ښاغلي مولوي محمد عباس آخند، د پېښو ته د رسېدو په چارو کې د دولت وزارت د سرپرست او ښاغلی مولوي شرف الدین د دې وزارت د مرستیال په توګه د یو محفل په ترڅ کې د یاد وزارت منسوبینو ته ور وپېژندل شول.
یاد محفل چې د ښاغلي غلام غوث ناصري د دې وزارت د پېښو د چارو همغږي مرستیال، ښاغلی مولوي سیف الدین د ا.ا.ا د چارو ادارې د اړیکو نایب مرستیال، مجاهدینو او منسوبینو په ګډون پېښو ته د رسېدو په چارو کې د دولت وزارت د کنفرانسونو په تالار کې ترسره شوی و، د قران مجید په څو آیاتو سره پیل شو.
لومړۍ ښاغلي مولوي سیف الدین د ا.ا.ا د چارو ادارې د اړیکو نایب مرستیال، د جلالتماب امیرالمومنین حفظه الله د فرمان د لوستلو ترڅنګ د شوروي اتحاد د سرو لښکرو د تیري، د امریکا او د هغه د متحدینو د تیري او د یرغلګرو پر وړاندې د مجاهدینو د سرښندنو په اړه خبرې وکړې او زیاته کړه چې د یادو پېښو له امله زرګونه کسان زموږ هیوادوال زیانمن شوي دي.
هغه هیله څرګنده کړه، چې د پېښو ته د رسېدو په چارو د دولت سرپرست وزیر او په دغه وزارت کې د هغه همکاران به د پېښو قربانیانو ته د قدر وړ خدمتونه وړاندې کړي.
وروسته د پېښو چارو د همغږۍ مرستیال غلام غوث ناصري وویل، د افغانستان د اسلامي امارت د پلانونو په رڼا کې موږ د طبیعي پېښو د خطرونو د کمولو او له طبیعي پېښو سره د مبارزې په برخه کې یو روښانه لیدلوری جوړ کړی دی، چې د راتلونکي لپاره لارې چارې بلل کېدای شي. هغه د ملي او نړیوالو سفارتونو او بنسټونو سره د بشري مرستو ترلاسه کولو په پآر د اړیکو اړتیا هم یاده کړه.
په همدې حال کې مولوي محمد عباس آخند د نظام په بدلون او له ټولنې څخه د فساد په له منځه وړلو کې د اسلامي امارت د برياليتوب په برخه کې د افغانستان د اسلامي امارت د باور د قدردانۍ په ترڅ کې وويل، چې د وزارت چوکۍ يو ستر او جدي مسووليت دی او په حقيقت کې هغه څوک چې په دې پوست کې دی، آمر نه خادم دی، خو ژمنه کوم چې د دغه وزارت د خدمتګار په توګه به د خلکو او په ځانګړې توګه د طبیعي او غیر طبیعي پېښو د قربانیانو خدمت کوم.
پېښو ته د رسېدو په چارو کې د دولت وزیر د نورو مسوولینو او منسوبینو څخه غوښتنه وکړه چې د خدای د رضا لپاره وطن ته خدمت او د پېښو له امله زیانمن شویو ته د رسېدو لپاره بې دریغه همکاري وکړي.
