په کابل کې د ماین پاکي په چارو کې د همکاري او د ماینونو د خطرونو په اړه د پوهاوي نړیواله ورځ ولمانځل شوه
کابل- د وړي ۱۷مه- ۱۴۰۱
محترم الحاج ملا محمد عباس آخند، پېښو ته د رسېدو په چارو کې د دولت وزیر نن سهار په یوه غونډه کې چې د ماینونو خطرونو څخه د پوهاوي او د ماین پاکي په چارو کې د همکاري نړیوالې ورځ په مناسبت ترسره شوي وه، وویل: د ماین پاکي مساله د ا.ا.ا له لومړیتوبونو څخه ده. هغه زیاته کړه د افغانستان اسلامي امارت مشرتابه په افغانستان کې د ماین پاکي پروګرام په برخه کې همکار او ژمن دی او تمه لري چې ډېر ژر به افغانستان له ماینونو څخه پاک شي.
پېښو ته د رسېدو په چارو کې د دولت وزارت وویل چې د ماینونو پاکول، پرمختګ، هوساینې او بیارغونې ته لاره هواروي.
ورته مهال محترم مولوي شرف الدین مسلم پېښو ته د رسېدو په چارو کې د دولت وزارت مرستیال، د محترم الحاج ملا عبدالغني برادر د ریاست الوزراء لومړي مرستیال او د پېښو سره مبارزې دولتي عالي کمیسیون رییس پیغام په لوستلو سره وویل: بدبختانه افغانستان څلور لسیزې جنګ تېر کړ چې نه جبرانېدونکي زیانونه او صدمې یې ګاللي دي.
ښاغلي مسلم زیاته کړه: د نورو زیانمنتوبونو ترڅنګ یو یې د ماینونو او ناچاوده توکو خښول دي چې هره ورځ د افغانستان له خلکو څخه قرباني اخلي. هغه وویل چې په ماینونو ککړ شویو سیمو د پاکولو لپاره زمینه برابره شوي ده او د ا.ا.ا هم په دې برخه کې د هراړخیزې همکاري لپاره ژمن دی او په دې برخه کې د ملاتړ کونکو هیوادونو د همکاري غوښتونکی شو.
ورپسې قاري نورالدین رستم خیل، پېښو ته د رسېدو په چارو کې د دولت وزارت د ماین پاکي او همغږۍ رییس وویل: د افغانستان د ماین پاکي پروګرام د مرسته کونکو هیوادونو په همکاري سره شاوخوا ۳۳۲۳ کیلومتره مربع ځمکه د ماینونو او ناچاوده توکو څخه پاکه کړي ده، خو لاهم ۶۰۶ کیلومتره مربع سیمې ککړې پاتې شوي دي.
ښاغلي رستم وایي چې په ۲۰۲۱ میلادي کال کې ۱۰۲۶ ملکي خلک د ماینونو او ناچاوده توکو له امله وژل شوي او ټپیان شوي دي او افغانستان اوس هم د ماین پاکي په برخه کې د نړیوالې ټولنې مرستو ته اړتیا لري.
ورته مهال د DRC او د هیلوټرسټ دفترونو په افغانستان کې ماین پاکي پروګرام لپاره هیله مندي ښودلي او د یاد پروګرام د بودجوي او مالي ملاتړ په برخه کې خپله ژمنتیا ښودلي.
د غونډه په پای کې پېښو ته د رسېدو په چارو کې د دولت وزیر، ماین پاکونکو ته د ستاینلیکونو په وېشلو سره د هغوۍ له کړونو څخه ستاینه وکړه.
