په هېواد کې د ۱۴۰۱ کال د مرغومي ۱۸مې د وروستیو بارانونو او واورو تازه جزیات
د هېواد د هوا پېژندنې ادارې د وړاندوینې له مخې د هېواد په ۲۰ ولایتونو؛ پکتیکا، پکتیا، لوګر، میدان وردګ، غزني، بامیان، غور، دایکندي، ارزګان، زابل، کندهار، هلمند، فراه، پنجشیر، بلخ، کاپیسا، لغمان، کونړ، نورستان او بدخشان کې بارانونه او واورې شوي دي.
چې د بدخشان ولایت پېښو سره د مبارزې ریاست د جلا راپورونو له مخې، ټول هغه کسان چې د یاوان ولسوالۍ په معدن کې بند پاتې وو، ژغورل شوي او د فیض اباد روغتون ته لېږدول شوي دي. همدارنګه د زياتې واورې ورېدو له امله د غور – کابل عمومي لاره تړل شوې او شپږ موټرونه په کې بند پاتې دي او د ټولګټو وزارت په همغږۍ د پاکولو چارې په شدت سره روانې دي او یوه چورلکه هم په سیمه کې د بند پاتې کسانو د ژغورنې لپاره استول شوي ده.
پېښو ته د رسېدو په چارو کې د دولت وزارت مشرتابه، د ټولو ولایتونو پېښو سره د مبارزې ریاستونو ته دنده سپارلې، چې د ټپیانو د ژغورنې بهیر ګړندۍ کړي، د پېښو له امله زیانمنو ته بېړنۍ رسېدنه وکړي او د احتمالي پېښو پر وړاندې بشپړ چمتووالۍ ونیسي.
د یادولو وړ ده چې پېښو ته د رسېدو په چارو کې د دولت وزارت د همکارو موسسو په همکارۍ د ژمي په موسم کې، احتمالي زیانمنو ته خوراکي، غیر خوراکي او نغدي مرستې وېشلې دي او همدارنګه د ژمي په فصل کې چې لارې تړل کېږي احتمالي پیښو ته د رسېدنې په موخه بیړنۍ بشري مرستې لېږلي دي.
