په بادغیس ولایت کې ناچاوده توکي کشف او خنثی شول
د بادغیس ولایت له پېښو سره د مبارزې آمادګۍ ریاست د همغږۍ پر بنسټ د DRC ماین پاکۍ نړیوالې موسسې تخنیکي ټیم د یاد ولایت د بالامرغاب ولسوالۍ په بېلا بېلو کلیو کې د ماین پاکۍ عملیاتو په ترڅ کې ۸ کړۍ ناچاوده توکي کشف او په خوندي ډول خنثی کړل.
د یادونې وړ ده، چې یاد ټیم د ماینونو او ناچاوده توکو په اړه د خلکو د پوهاوي لوړولو په موخه د پوهاوي پروګرام هم ترسره کړ ترڅو د احتمالي خطرونو مخنیوي او د خلکو ځان او مال خوندي شي.
دا ناچاوده توکي د تېرو جګړو پاتې شوني وو او د سیمې د اوسېدونکو لپاره خطر پېښ کړی و، له پېښو سره د مبارزې آمادګۍ ریاست مسؤلینو له خلکو وغوښتل چې د هر ډول ناچاوده توکو د لیدو په صورت کې له اړونده مسؤلینو سره اړیکه ونیسي څو د تلفاتو او خساراتو د مخنیوي لپاره اړین اقدامات ترسره شي.
د یادونې وړ ده، چې د خلکو د ځان او مال د خوندیتوب لپاره د ولایت په کچه د ماینونو او ناچاوده توکو د موندلو او له منځه وړلو بهیر دوام لري.
نېټه: ۱۴۴۷/۷/۰۴ هـ ق
له پېښو سره د مبارزې آمادګۍ ملي اداره
