له پېښو سره د مبارزې آمادګۍ ملي ادارې لوی رئیس، د لغمان ولايت علینګار ولسوالۍ ته په سفر کې د يو کیبلي پل جوړېدو له ځای څخه لیدنه وکړه
له پېښو سره د مبارزې آمادګۍ ملي ادارې لوی رئیس, محترم الحاج ملا نورالدین ترابي، لغمان ولایت ته په سفر کې د یاد ولایت له پېښو سره د مبارزې آمادګۍ رئیس، قاري خیر محمد غازي او یو شمېر سیمه ییزو مشرانو په ملتیا د علینګار ولسوالۍ اړوند د برخان بابا د کیبلي پل جوړېدو له ځای څخه لیدنه وکړه.
محترم ترابي صاحب د پل جوړېدو له ځای څخه د لیدنې پر مهال وویل، چې د پل د نشتون له امله د سیمې خلک له ستونزو سره مخ دي او له پېښو سره د مبارزې آمادګۍ ملي اداره ژمنه ده، چې د خلکو ستونزو ته پر وخت رسېدنه وکړي او د خلکو لپاره ټولې آسانتیاوې برابرې کړي. هغه د کیبلي پل جوړولو د پروژې د کار د پیل او لوړ کیفیت په پام کې نیولو په هکله مسؤلینو ته اړینې لارښوونې هم وکړې.
د ادارې لوی رئیس وویل، چې د دغه پل د جوړولو لپاره مو د درې ميليونه او څلور نوي زره او اته سوه څلور پنځوس (۳,۰۹۴,۸۵۴) افغانیو بودجه منظوره کړې ده او په نږدې درېیو میاشتو کې به یې د جوړولو کارونه پای ته و رسېږي.
د یادونې وړ ده، چې دا کیبلي پل چې درې کاله وړاندې د سختو سېلابونو له امله ویجاړ شوی و، د علینګار له عمومي سړک سره ۱۳ لوی او کوچني کلي نښلوي او په جوړېدو سره به یې تقريباً پنځلس زره (۱۵,۰۰۰) کورنۍ د تګ راتګ لپاره ترې ګټه پورته کوي.
نېټه: ۱۴۴۷/۰۳/۲۳ هـ ق
له پېښو سره د مبارزې آمادګۍ ملي اداره
