له پېښو سره د مبارزې آمادګۍ ملي ادارې سرپرست د افغانستان لپاره د ناروې هېواد له شارژدافیر سره وکتل
نن ورځ چهار شنبه له پيښو سره د مبارزې آمادګۍ ملي ادارې سرپرست الحاج ملا نورالدین ترابي د افغانستان لپاره د ناروې هېواد له شارژدافیر پییر آلبرت الساس او لومړۍ سکرتر اولي کیرک واک سره وکتل.
ترابي صاحب راغلي پلاوي ته ښه راغلاست ووېل او زیاته یې کړه چې د ناروې هیواد د افغانستان سره لازمې همکارۍکړې دي, او موږ یې منندوی یو او تل یې د افغانستان په شمول د بیلابیلو هیوادونو د پېښځپلو خلکو سره مرستي کړې دي او موږ غوښتنه کوو چې خپلو مرستو ته دوام ورکړي.
همداراز ترابي صاحب د افغانستان لپاره د ناروې هیواد له چارسمبالی څخه وغوښتل چې دطبیعي او غیر طبیعي پېښو، د بیړنیو حالاتو، د خطرونو د مدیریت، د اقلیمي بدلون او د وقایوې پروژو لپاره د یادي ادارې سره همکاري وکړي.
وروسته د افغانستان لپاره د ناروې هېواد شارژدافیر پییر آلبرت الساس له پېښو سره د مبارزې آمادګۍ ملي ادارې له سرپرست څخه مننه وکړه چې په تیرو څو میاشتو کي یې د بیلابیلو مؤسیسو سره زیاتی تفاهم نامې لاسلیک کړې دي او همداراز یې د خپل هېواد د همکاریو یادونه وکړه او وویل چې موږ د دولت د اصولو، وزارتونو او دولتي ادارو د غوښتنو پر اساس همکارۍ کړي دي او لا به هم خپلي همکارۍ ته دوام ورکړو.
په پای کې دواړو خواوو په بېړنيو حالاتو او بيړنيو پروژو کې د بشري مرستو رسونې او د اړیکو پر ساتلو ټینګار وکړ.
۱۴۴۶/۸/۱۳ هــ ق
له پېښو سره د مبارزې امادګۍ ملي اداره
