له پېښو سره د مبارزې آمادګۍ ملي ادارې او د خوړو نړیوال پروګرام (WFP) ترمنځ د ګډو همکاریو په اړه تخنیکي غونډه ترسره شوه

نن ورځ د (پنجشنبې) په سهار، له پېښو سره د مبارزې آمادګۍ ملي ادارې او د خوړو نړیوال پروګرام تر منځ د ګډو همکاریو په اړه تخنیکي غونډه د کارکوونکو چارو ريیس؛ الحاج مولوي محمد عابد نعماني، د پلان او پالیسۍ رییس؛ ملا محمد جاوید عباس، د خوړو د نړیوال پروګرام د اړیکو مسؤل؛ اون شیورټ، د بیړنیو چارو مسؤل؛ منصف الله انوري، د پلان جوړونې مسؤل؛ عبدالرزاق ایوبي، د بشري مرستو مسؤل؛ عبدالغفور نوابي او د دې ادارې د یو شمېر نورو آمرینو په شتون کې ترسره شوه.
په دې غونډه کې، د کارکوونکو چارو رييس الحاج مولوي محمد عابد نعماني ټينګار وکړ، چې د خوړو نړيوال پروګرام تل د افغانستان له خلکو سره بشري مرستې کړې دي، چې له امله يې د دغې موسسې قدرداني کوو او د مرستو د دوام او لا زیاتوالي غوښتونکي یو.
هغه زياته کړه، چې د دې ادارې فعاليتونه غير سياسي دي او اصلي موخه يې له زيانمنو شوو کسانو سره مرسته ده. هغه همداراز د خوړو له نړيوال پروګرام څخه وغوښتل چې خپلې مرستې له پخوا لا زیاتې کړي.
په ورته وخت کې د خوړو نړيوال پروګرام د اړیکو مسؤل آن شيورټ، د دغې ادارې له همکارۍ مننه وکړه او ويې ويل چې د دوی سازمان تل هڅه کوي چې خلکو ته لا ښه خدمات وړاندې کړي.
هغه ټینګار وکړ چې دواړه خواوې به په ګډه کار کوي تر څو زیانمنو کورنیو ته د مرستو رسولو لړۍ چټکه او لاښه خدمات ورته وړاندې کړي. 
ورپسې د غونډې ګډونوالو د خپلو فعالیتونو او لاسته راوړنو تفصیلي راپورونه وړاندې کړل او د بشري مرستو په برخه کې یې د دوامداره همغږۍ او همکارۍ پر اړتیا ټینګار وکړ.

نېټه:۱۴۴۶/۸/۲۱
له پېښو سره د مبارزې آمادګۍ ملي اداره