له پېښو سره د مبارزې آمادګۍ ملي ادارې او د  جینوا کال مؤسسې ترمنځ د ۳۲۸,۷۹۷ ډالرو په ارزښت د ګډو همکاریو تفاهم نامه لاسلیک شوه 

 نن ورځ د سې شنبې په ماسپښین، له پېښو سره د مبارزې آمادګۍ ملي ادارې سرپرست؛ محترم الحاج ملا نورالدین ترابي، په افغانستان کې د جینوا کال (Geneva Call) مؤسسې له رئیس؛ محترم فهد عباسي سره په خپل کاري دفتر کې وکتل او د ګډو همکاریو تفاهم‌نامه یې ورسره لاسلیک کړه.
په پیل کې، ترابي صاحب د یادې مؤسسې راغلي پلاوي ته ښه راغلاست وویل او زیاته یې کړه، چې موږ په دې هڅه کې یو ترڅو له نړیوالو ډونرانو سره له نیږې څخه ووینو او له هغوی سره په افغانستان کې د طبیعي پېښو له امله د زیانمنو شویو، اړمنو او مستحقو کورنیو په اړه خبرې وکړو. 
ورپسې،  په افغانستان کې د جینوا کال مؤسسې رئیس؛ محترم فهد د خپلې پروژې په اړه معلومات وړاندې کړل او ویې ویل، چې موږ د دې غوښتونکي یو ترڅو له نړیوالو ډونرانو څخه د افغانستان د ځورېدلي ملت په ځانګړي ډول له طبیعي پېښو څخه د زیانمنو شویو خلکو لپاره زیاتې مرستې ترلاسه کړو.  
 د یادونې وړ ده، چې په پای کې د دواړو لوریو تر منځ ټولټال د درې سوه، آته ویشت زره او اووه سوه او اووه نوي (۳۲۸,۷۹۷) ډالرو په ارزښت د ګډو همکاریو تفاهم نامه لاسلیک شوه، چې له مخې به یې په کابل، کندهار، ننګرهار، کندز، بلخ، بامیان، کنړ او پروان ولایتونو کې، بشري مرستو ته د اغېزمن لاسرسي او د نړیوالو بشري او بشردوستانه حقوقو په اړه د ښکېلو اړخونو په موخه د ۲۵ ګډون کوونکو لپاره د دوه ورځني ورکشاپ دائیرول او په کابل ولایت کې د څلورو او په پورته یادو شویو نورو ولایتونو کې، بشري مرستو ته د اغېزمن لاسرسي او د نړیوالو بشري او بشردوستانه حقوقو په اړه د همغږۍ د دوه اړخیز او څو اړخیزو مجلسونو برابرول او همدارنګه، په کابل ولایت کې د بشري مرستو او نړیوالو بشري او بشر دوستانه حقوقو په اړه د ۲۵ ګډون کوونکو لپاره په ملي او نړیواله کچه د ورکشاپ رامنځته کول او په همدې ولایت کې به د ۲۵ ګډون کوونکو لپاره په ملي کچه بشري مرستو ته د اغېزمن لاسرسي او د نړیوال بشري او بشردوستانه حقوقو په اړه د ګڼو ښکېلو اړخونو لپاره درې ورځنی ورکشاپ دائیرېږي.  

نېټه: ۱۴۴۷/۱/۱۲ هـ ق
له پېښو سره د مبارزې آمادګۍ ملي اداره