د کندهار ولایت په دامان ولسوالۍ کې د مانده او سېلابي لارې د پاکولو چارې پیل شوې
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي د لارښوونې پر بنسټ، د کندهار ولایت له پېښو سره د مبارزې آمادګۍ ریاست د دامان ولسوالۍ د نهر رباط په کلي کې د مانده او سېلابي لارې د پاکولو چارې رسماً پیل کړې.
د دغې پروژې د پرانیستې مراسم د کندهار ولایت له پېښو سره د مبارزې آمادګۍ ریاست د مسؤلینو، د دامان ولسوالۍ د استازي، د کلي د ملک، مخورو سپین ږیرو او ځوانانو په شتون کې ترسره شول. مسؤلینو د پروژې موخه د پېښو د خطرونو کمول، د سېلابي اوبو منظم مدیریت او د استوګنیزو کورونو او کرنیزو ځمکو څخه د اوبو د مسیر خوندي اړول وبلل.
له پېښو سره د مبارزې آمادګۍ ریاست د مسؤلینو په وینا، د مانده او سېلابي لارې د پاکولو پروژه د نهر رباط په کلي کې د ۹۰۰ متره په اوږدوالي، د ۳ متره په پلنوالي او له ۱ څخه تر ۱.۵ متره په ژوروالي پلي کېږي، چې د پلي کېدو ټولیز لګښت یې ۸۰,۰۰۰ زره افغانۍ دی.
ټاکل شوې ده چې د دغې پروژې په بشپړېدو سره به ۶۰ کورنۍ او سلګونه جریبه کرنیزې ځمکې د سېلابي اوبو له ګواښ څخه خوندي شي. همدا راز د کرنیزو حاصلاتو د ساتنې، د ځمکو د وېجاړېدو د مخنیوي او د سیمې د اوسېدونکو د اقتصادي وضعیت په ښه والي کې مهم رول ولوبوي.
د پروژې د پرانیستې په پای کې، د سیمې مشرانو او اوسېدونکو د کندهار ولایت له پېښو سره د مبارزې آمادګۍ ریاست له هڅو او همکاریو څخه مننه وکړه او هیله یې څرګنده کړه چې په راتلونکې کې هم د ورته وقایوي او بنسټیزو پروژو د پلي کېدو لړۍ دوام ومومي، ترڅو خلک د طبیعي پېښو له زیانونو خوندي او د ژوند شرایط یې لا ښه شي.
نېټه: ۱۴۴۷/۱۲/۲۳ هـ ق
له پېښو سره د مبارزې آمادګۍ اداره
