د هرات ولایت د پښتون زرغون ولسوالۍ د هریرود سیند پر غاړه د سېلاي لارو د پاکولو چارې پیل شوې
له پېښو سره د مبارزې آمادګۍ ملي ادارې لوی رئیس، الحاج ملا نورالدین ترابي د لارښوونې پر بنسټ، چې د دې ادارې ټولو ولایتي ریاستونو ته یې د سېلابي لارو د پاکولو لارښوونه کړې ده، د هرات ولایت له پېښو سره د مبارزې آمادګۍ ریاست د سېلابونو د احتمالي خطرونو د کمولو او د هستوګنې کورونو، کرنیزو ځمکو او عامه تأسیساتو د زیانونو د مخنیوي په موخه، د پښتون زرغون ولسوالۍ د نورستان کشمیرآباد کلي په سیمه کې د هریرود سیند پر غاړه د سېلابي لارو د چِکړو د پاکولو پروژه پيل کړه.
یاده پروژه د تخنیکي سروې او ارزونې له مخې، چې دا سیمه یې له خطر سره مخ تشخیص کړې وه، د هرات ولایت له پېښو سره د مبارزې آمادګۍ رئیس، الحاج مولوي محمد موسی اشعري، په شتون کې رسماً پرانیستل شوه.
د پروژې د پرانیستې پر مهال، له پېښو سره د مبارزې آمادګۍ رئیس له سیمې کتنه وکړه او د کار د چټکتیا په اړه یې اړوندو مسؤلینو ته لازمې لارښوونې وکړې.
یاده پروژه د هرات ولایت له پېښو سره د مبارزې آمادګۍ ریاست له بودجې تمویلېږي او د هرات ولایت د ټولګټو ریاست د ماشینرۍ په همکارۍ پلي کېږي.
د پروژې اوږدوالی ۱.۳ کیلومتره دی او ټاکل شوې چې په راتلونکو لسو ورځو کې به بشپړه شي. د دې پروژې له بشپړېدو وروسته به شاوخوا ۴۰۰ کورنۍ د سېلابونو له احتمالي خطرونو څخه خوندي پاتې شي.
نېټه: ۱۴۴۷/۰۵/۱۳ هـ ق
له پېښو سره د مبارزې آمادګۍ ملي اداره
