د غزني ولایت په قره باغ ولسوالۍ کې په لاس جوړ شوی یو ماین کشف او خنثی شو
له پېښو سره د مبارزې آمادګۍ ملي ادارې د ماین پاکۍ د همغږۍ او انسجام ریاست، د بېړنۍ شمېرې (0708606060) له لارې ترلاسه شوې اړیکې پر بنسټ، د ایریا ماین پاکۍ موسسې د بيړنۍ ځواب وینې شپږم ټېم، د غزني ولایت د قره باغ ولسوالۍ هارون خیلو کلي (مانو کلا) سېمې ته د ماین پاکۍ د عملیاتو لپاره ولېږدوه.
د ماین پاکۍ ټیم د یاد ولایت له پېښو سره د مبارزې آمادګۍ ریاست په همغږۍ، په یاده سیمه کې د عملیاتو په ترڅ کې، یو عدد په لاس جوړ شوی ماین چې له تېرو جګړو څخه پاتې شوی و او د سېمې د اوسېدونکو ژوند یې له ګواښ سره مخ کړی و، کشف په خوندي ډول انتقال او له منځه یووړ.
همدارنګه، د ماین پاکۍ ټیم له جګړو څخه پاتې ماینونو او چاودېدونکو توکو د احتمالي پېښو د مخنیوي په موخه، د سېمې اوسېدونکو ته د ماینونو او ناچاوده توکو د خطرونو په اړه د عامه پوهاوي پروګرام هم ترسره کړ.
د سېمې اوسېدونکو له پېښو سره د مبارزې آمادګۍ ریاست او د ماین پاکۍ ټیم د چټک غبرګون څخه مننه وکړه چې د دې خطر په رفع کولو کې یې بېړنی اقدام وکړ.
نېټه:۱۴۴۷/۷/۲۴ هـ ق
له پېښو سره د مبارزې آمادګۍ ملي اداره
