جمهوررئیس غني پېښو ته د رسېدو په چارو کې د دولت وزیر رسماً معرفي کړ
![3](/sites/default/files/2020-05/6.jpg)
د افغانستان د اسلامي جمهوریت جمهوررئیس محمد اشرف غني نن له غرمې مخکې د یو لړ مراسمو په ترڅ کې غلام بهاوالدین جیلاني پېښو ته د رسېدو په چارو کې د دولت د وزیر په توګه معرفي کړ.
په دغو مراسمو کې چې په ارګ کې ترسره شول، د جمهوري ریاست لومړي مرستیال امرالله صالح هم حضور درلود، لومړی د جمهوري ریاست د چارو ادارې عمومي رئیس ډاکتر فضل محمود فضلي پېښو ته د رسېدو په چارو کې د دولت د وزیر په توګه د غلام بهاوالدین جیلاني د ګمارنې په اړه د جمهوررئیس فرمان ولوست.
وروسته پېښو ته د رسېدو په چارو کې د دولت مخکېني وزیر نجیب اقا فهیم وویل، د افغانستان د اسلامي جمهوري دولت د برنامو په رڼا کې، د اوبو مدیریت په اړه مو روښانه لیدلوری ترسیم کړ او د پېښو د خطرونو د کموالي ستراتېژي مو تدوین کړه چې کېدای شي راتلونکې ته لار نقشه وي.
وروسته پېښو ته د رسېدو په چارو کې د دولت وزیر غلام بهاوالدین جیلاني د جمهوررئیس او د حکومت د رهبرۍ له باور څخه په مننې وویل، ډېر خوشاله یم چې په خدمت کې قرار لرم او ژمنه کوم چې زموږ د ګډ کور افغانستان لپاره به خپلې هڅې دریغ نه کړم.
جمهوررئیس غني یادو مراسمو ته د وینا پرمهال د افغانستان د شهیدانو په ځانګړي ډول د هیواد د وروستیو پېښو د شهیدانو روح ته دعا وکړه.
جمهوررئیس پېښو ته د رسېدو په چارو کې د دولت د مخکېني وزیر نجیب اقا فهیم د زیار، هڅو، سالم مدیریت او ژمنتیا مننه وکړه وې ویل، موږ باید د پېښو رامنځته کېدو ته په تمه ونه اوسو، بلکې پېښې، اوبه او سېلابونه مدیریت کړو.
د هیواد جمهوررئیس د خپلو خبرو په پای کې وویل، اقلیم د بدلون په حال کې دی، د تېر په پرتله به د کډوالۍ کچه زیاته شي او موږ باید اقلیمي بدلونونو ته لازم تدابیر ولرو.