له پېښو سره د مبارزې آمادګۍ ملي ادارې لوی رئیس په قطر کې مېشت د افغان سوداګرو له لوري د کونړ له زلزله ځپلو سره شوې نغدې مرستې په یاد هېواد کې د افغانستان اسلامي امارت له سفیر څخه ترلاسه کړې
نن ماسپښین د شنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي د قطر لپاره د افغانستان اسلامي امارت له سفیر محترم محمد سهیل شاهین سره په خپل کاري دفتر کې وکتل او له هغه څخه یې په قطر کې د افغان سوداګرو له لوري د کونړ ولایت له زلزله ځپلو سره شوې نغدې مرستې ترلاسه کړې.
په دې ناسته کې، محترم ترابي صاحب له افغان سوداګرو او کاریګرو څخه د قدردانۍ ترڅنګ وویل، چې د کونړ ولایت زلزله ځپلي خلک لا هم مرستو ته اړتیا لري او موږ په دې برخه کې اړین اقدامات ترسره کړي او هڅه کوو چې د زلزله ځپلو لپاره نورې مرستې هم برابرې کړو. نوموړي وویل چې دا نغدې پیسې به د زلزله ځپلو اړتیاوو ته په کتو وکارول شي او همدارنګه یې په نورو سوداګرو او خییرو کسانو غږ وکړ چې د اړمنو خلکو د مرستې لپاره خپلې همکارۍ او ملاتړ ته دوام ورکړي.
ورته مهال، په قطر کې د افغانستان اسلامي امارت سفیر، محترم محمد سهیل شاهین، زیانمنو کسانو ته د رسېدنې، له ملي او نړیوالو مرستندویه موسسو سره د همغږۍ او تعامل، او د ادارې د وړتیا لوړولو په برخه کې له پېښو سره د مبارزې آمادګۍ ادارې د فعالیتونو ستاینه وکړه او د دې ادارې هڅې یې اغېزناکې وبللې. نوموړي همدارنګه وویل چې له خپلې خوا به هڅه وکړي ترڅو د زلزله ځپلو لپاره نورې مرستې هم را جلب کړي.
د یادونې وړ ده چې د غونډې په پای کې د ۲۶,۳۰۰ ډالرو نغدي مرسته، چې په قطر کې مېشتو افغان سوداګرو او کاریګرو د کونړ ولایت د وروستیو زلزله ځپلو سره د مرستې لپاره راټولې کړې وه، د هیواد د سفیر له لوري له پېښو سره د مبارزې آمادګۍ ادارې لوی رئیس ته وسپارل شوه.
نیټه: ۱۴۴۷/۰۴/۱۱ هـ ق
له پېښو سره د مبارزې آمادګۍ ملي اداره
