له پېښو سره د مبارزې آمادګۍ ملي ادارې او د اکشن اېډ موسسې ترمنځ د درې سوه، اته شپېته زره او پنځه سوه اته اتیا (۳۶۸،۵۸۸) ډالرو په ارزښت د ګډو همکاریو تفاهمنامه لاسلیک شوه
نن د دوشنبې په ورځ له غرمې وروسته، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د اکشن اېډ موسسې له رئیس، محترم سری کانتا میسرا سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې، محترم ترابي صاحب د یادې موسسې پلاوي ته ښه راغلاست وویل او له دې موسسې څخه یې له زیانمنو سره د دوامداره مرستو د کولو په پار مننه وکړه او همداراز یې یادې موسسې ته د هغوی په کارونو کې د هر ډول ستونزو د رامنځته کېدلو په صورت کې د ستونزو د حل کولو په اړه ډاډ ورکړ او له یادې موسسې څخه یې وغوښتل، چې د افغانستان هېواد له کړېدلي ملت سره دې خپلې مرستې جاري وساتي.
ورپسې، د اکشن اېډ موسسې رئیس، محترم سری کانتا میسرا، د خپلې پروژې په اړه معلومات وړاندې کړل او له پېښو سره د مبارزې آمادګۍ ملي ادارې د چارو په ځانګړي ډول له موسسو سره د تفاهم نامو د لاسلیک کولو په برخه کې د چټکتیا له شتون څخه ستاینه وکړه او له محترم ترابي صاحب څخه یې د تفاهم نامې د لاسلیک کولو د زمینې برابرولو په پار مننه وکړه.
د یادونې وړ ده، چې د دې ناستې په پای کې د دواړو لوریو ترمنځ ټولټال د درې سوه، اته شپېته زره او پنځه سوه اته اتیا (۳۶۸،۵۸۸) ډالرو په ارزښت د ګډو همکاریو تفاهمنامه لاسلیک شوه. د دې تفاهمنامې له مخې به، د سرپل ولایت د سوزمه قلعه، سنچارک او ګوسفندي ولسوالیو په هغو سیمو کې چې د ورستیو وچکالیو له امله زیانمنې شوې دي د دوه سوه پنځه زره او دوه سوه (۲۰۵،۲۰۰) ډالرو په ارزښت چکډیمونه او کوچني بندونه جوړ شي او همدارنګه د دې ولایت په یادو ولسوالیو کې به د باران د اوبو د ذخیره کولو په موخه کندې وکېندل شي، چې د ۲۰ ورځو لپاره به ۹۰۰ کارکوونکو هر یو ته د دغو کندو د کېندلو لپاره د ورځې ۵ ډالر ورکول کېږي.
نېټه: ۱۴۴۷/۱/۱۸ هـ ق
پېښو سره د مبارزې آمادګۍ ملي اداره
