پېښو ته د رسېدو په چارو کې د دولت وزارت د مالي او اداري عمومي رییس او سرپرست کندهار ولایت ته سفر وکړ
کندهار- د غویي ۳مه-۱۴۰۳
محترم الحاج مولوي عبدالرحمن زاهد، پېښو ته د رسېدو په چارو کې د دولت وزارت د مالي او اداري عمومي رییس او سرپرست د کندهار ولایت په بېلابېلو ولسوالیو کې د وروستیو سیلابونو له امله زیانمنو سره وکتل او خپله خواخوږي یې څرګنده کړه.
پېښو ته د رسېدو په چارو کې د دولت وزارت سرپرست، د وروستیو سېلابونو له امله زیانمنو ته د رسېدنې په موخه د محترم قاري محمد خوشحال زماني د بېړنیو حالاتو د عملیاتو مرکز رییس او د یو پلاوي په ملتیا کندهار ولایت ته سفر وکړ، او په دې سفر کې یې له قاري عبدالسلام عمري، د دې ولایت پېښو سره د مبارزې رییس، د وروستیو سېلابونو له امله ټپیانو، د شهیدانو وارثینو او زیانمنو سیمو څخه د لیدنې په ترڅ کې له زیانمنو سره د خواخوږي ترڅنګ د هغوۍ ستونزې او ننګونې واورېدې او د شهیدانو وارثینو او ټپیانو ته یې نغدي مرستې ووېشلې.
همدارنګه د سېلابونو له امله په دغه ولایت کې ۸ کسان شهیدان، ۱۶ کسان ټپیان، ۴۳۴ کورونه په نیمه او بشپړ ډول ویجاړ شوي، د دې ترڅنګ ۴۸۴ څاروي تلف شوي او ۳۷۶۰ کرنیزې ځمکې هم ویجاړې شوي دي.
د یادونې وړ ده چې په دې ولایت کې سېلاب ځپلو ته د رسېدنې په موخه له سروې سره هم مهاله د مرستو رسولو لړۍ هم روانه ده.
