په پنجشیر ولایت کې د دوو زیانمنونکو سیمو د وقایوي او تحکیمولو له چارو څخه لیدنه او ارزونه وشوه
د پنجشیر ولایت له پېښو سره د مبارزې ولایتي کمېسیون د څارنې ټیم په دوو بېلابېلو سیمو کې د وقایوي چارو د پلي کېدو له بهیر څخه څارنه او ارزونه وکړه:
۱. د رخه ولسوالۍ د د پیاوشت کلي د نښلوونکي سړک تحکیمول
په دې برخه کې، د سړک د تحکیمولو چارې په حضوري ډول وکتل شوې. له پېښو سره د مبارزې آمادګۍ ریاست اړین مواد، په ځانګړي ډول د ګبیون بکسونه، چمتو او ساحې ته انتقال کړي دي. د ګبیونونو د تثبیت او نصب عملي کار د سیمې اوسېدونکو لخوا، د پلان سره سم، په منظم ډول پر مخ دوان دی.
دا وقایوي پروژه ۱۶ متره اوږدوالی، ۲ متره پلنوالی او ۸ متره لوړوالی لري. همدارنګه، اړوندو مسؤلینو ته د تخنیکي معیارونو لکه د تړلو طریقه، همسطحجوړولو او د ګبیونونو د تراکم په اړه لازمې لارښوونې ورکړل شوې.
۲. د دوآب عمرض حصه اول کلي د استنادي دیوال تحکیمول
له پېښو سره د مبارزې ولایتي کمېسیون د تخنیکي ټیم د پخواني راپور پر بنسټ، یو استنادي دیوال چې د سیلاب او د اوبو د لوړېدو د خطرونو د مخنیوي لپاره د سیمې د اوسېدونکو د کورونو د خوندیتوب لپاره جوړ شوی و، د وېجاړېدو له امله د نړېدو په حال کې و، له پېښو سره د مبارزې آمادګۍ ریاست د هڅو په پایله کې، د ۳۰ ګبیوني بکسونو په نصبولو سره احتمالي خطرونه په اغېزمنه توګه له منځه تللي دي. دا استنادي دیوال ۶۰ متره اوږدوالی او ۱ متر پلنوالی لري.
د څارنې په پای کې، اړوندو مسؤلینو ته د تخنیکي معیارونو، د خوندیتوب اصولو او د کارونو د چټک پرمختګ په اړه لازمې لارښوونې ورکړل شوې.
نېټه: ۱۴۴۷/۷/۱۶ هـ ق
له پېښو سره د مبارزې آمادګۍ ملي اداره
