په ننګرهار ولایت کې د حرفوي زده کړو ۸۰ تنه زده کوونکو ته نغدي مرستې ووېشل شوې
له پېښو سره د مبارزې امادګۍ ملي ادارې او د (AYSO) مؤسسې تر منځ د لاسلیک شوي هوکړه لیک پر بنسټ، د ننګرهار ولایت له پېښو سره د مبارزې امادګۍ ریاست د یادې مؤسسې په ملاتړ، د دې ولایت په سره رود ولسوالۍ کې ۸۰ تنو د حرفوي زده کړو زده کوونکو ته له سروې وروسته نغدي مرستې ووېشلې.
په دې لړۍ کې هر زده کوونکي ته د هغوی د ځان بساینې په موخه د مسؤلینو په شتون کې ۷،۱۴۰ افغانۍ ووېشل شوې، چې ټولټال یاد شمېر زده کوونکو ته پنځه سوه او یو اویا زره او دوه سوه (۵۷۱,۲۰۰) افغانۍ په پام کې نیول شوې وې.
په یادو مرستو ترلاسه کوونکو کسانو کې ٢٠ تنه ښځینه د سلمه دوزۍ، ٢٠ تنه ښځینه د قالین بافۍ، ٢٠ تنه نارینه د سولر او بیټرۍ ترمیم او ٢٠ تنه نارینه د موبایل جوړونې زده کوونکو شتون درلود.
د یادونې وړ ده، چې سیمه ییزو اوسېدونکو د اړونده مؤسسې د یاد اقدام هرکلی وکړ او ویې ویل چې دا ډول مرستې به د ښځو او ځوانانو په اقتصادي او ځان بساینې برخه کې مهم رول ولوبوي.
نېټه: ۱۴۴۷/۷/۱۴ هـ ق
له پېښو سره د مبارزې آمادګۍ ملي اداره
