په فراه ولایت کې بېلابېل چاودېدونکي توکي کشف او خنثی شول
د فراه ولایت له پېښو سره د مبارزې آمادګۍ ریاست ماین پاکۍ مؤسسو په ملاتړ، بېلابېل چاودېدونکي توکي په خوندي توګه خنثی کړل، د دې ولایت د پشتکوه ولسوالۍ په کوجر او د فراه رود ولسوالۍ په آبخرما سیمه کې بېلابېل چاودېدونکي توکي د DRC ماین پاکۍ مؤسسې د تخنیکي ټيم په همکارۍ یو فیر د هاوان مرمۍ، دوه کړۍ خوشه یي ماینونه او ۲۸ فیره ۴۰ ملي متري نارنجک کشف او په خوندي ډول له منځه یوړل شول.
همدارنګه په جوین ولسوالۍ کې د ایریا ماین پاکۍ مؤسسې د مسلکي ټیم په ملاتړ، دوه کړۍ د ټانک ضد MK7، د ۲۵۰ کیلو باروت دوه متره چاودېدونکی سیم او یو عدد برېښنایي فیوز، چې د یادې سیمې د اوسېدونکو ژوند یې له خطر سره مخ کړی وو په خوندي توګه خنثی شول.
د یادونې وړ ده، چې د فراه ولایت له پېښو سره د مبارزې امادګۍ ریاست مسئولینو ټینګار وکړ چې له تېرو جګړو څخه پاتې شویو چاودېدونکو توکو د سیمه ییزو اوسېدونکو ژوند له ګواښ سره مخ کړی دی، چې د پاکولو لپاره به یې د هېواد په کچه هڅې دوام ولري او همدارنګه یې له خلکو وغوښتل، چې د هر ډول مشکوکو يا چاودېدونکو توکو د لیدو په صورت کې دې، ژر تر ژره له اړوندو مسؤلينو سره اړيکه ونيسي، تر څو یې د خنثی کولو لپاره اړين اقدامات ترسره شي.
نېټه: ۱۴۴۷/۸/۰۳ هـ ق
له پېښو سره د مبارزې آمادګۍ ملي اداره
