په بغلان ولایت کې له جګړو څخه پاتې شوي ٦١ چاودېدونکي توکي کشف او خنثی شول
د ماین پاکۍ د بیړني شمېرې (0708606060) له مخې، د ماین پاکۍ د انسجام او همغږۍ ریاست د ATC مؤسسې د چټک غبرګون ټیم په ملاتړ، د بغلان ولایت د دهنه غوري ولسوالۍ د چشمه شیر عالي لېسې په سیمه کې د جګړې څخه پاتې شوي ٦١ کړۍ چاودېدونکي توکي کشف او له منځه یوړل.
د څېړنیز ټیم د موندنو له مخې، دا ځای یوه شکمنه سیمه وه چې د ځایی اوسېدونکو لپاره یو جدي ګواښ ګڼل کېده او په تېرو وختونو کې هم د بشري پېښو سبب او هم د استوګنې تأسیساتو ته زیان رسولو سبب شوي وو. د ATC د ګرځنده ټیم لخوا د بشپړې پلټنې وروسته، د چاودېدونکو توکو یوه د پام وړ اندازه کشف او په خوندي ډول له منځه یوړل شوه.
له عملیاتو وروسته، ځایی اوسېدونکو ته د ماین پاکۍ د خطرونو په اړه د پوهاوي زده کړې ورکړل شوې. همدارنګه دوی ته د ماین پاکۍ بیړنۍ شمېره هم ورکړل شوه ترڅو د شکمنو شیانو د لیدلو په صورت کې له اړونده مسؤلینو سره اړیکه ونیسي.
نیټه: ۱۴۴۷/١/٢٥ هـ ق
له پېښو سره د مبارزې آمادګۍ ملي اداره
