په افغانستان کې د بشري مرستو دوام ته د آقا خان دفتر ژمنتیا
کابل- د مرغومي ۷مه-۱۴۰۱
محترم الحاج ملا محمد عباس آخند پېښو ته د رسېدو په چارو کې د دولت وزیر، د ښاغلي علي اکبر پسناني په افغانستان کې د آقا خان له ځانګړي استازي او د استوګنې لپاره د آقا خان د دفتر له استازو سره وکتل.
په دې کتنه کې الحاج ملا محمد عباس آخند د ښه راغلاست ترڅنګ په افغانستان کې د آقاخان دفتر له فعالیتونو څخه د ستاینې په ترڅ کې وویل: د پیښو او بیړنیو حالاتو په مدیریت کې د آقاخان دفتر همکاري مهمه او حیاتي ده.
پېښو ته د رسېدو په چارو کې د دولت وزیر په وروستیو لسیزو کې جګړو او د طبیعي پېښو په وړاندې د خلکو د زیانونو کچې ته په اشارې سره، د پېښو مدیریت په برخه کې د بېړنیو پروژو د پلي کولو، د بېړنیو بشري مرستو او نورو چارو په برخه کې د آقا خان له دفتر سره د نږدې همکارۍ او همغږۍ غوښتنه وکړه.
ورپسې علي اکبر پسناني په افغانستان کې د آقا خان ځانګړي استازي پېښو ته د رسېدو په چارو کې د دولت وزیر له ملاتړ څخه د مننې په ترڅ کې وویل: د استوګنې لپاره د آقا خان دفتر د طبیعي پیښو د خطرونو د نقشې ترتیب، لټون او ژغورنې، بیړنۍ بشري رسېدنه، د کوچنیو بیړنیو پروژو پلي کولو او د دې وزارت د کارمندانو لپاره د ظرفیت لوړولو په برخو کې کار کوي.
ښاغلي پساني زیاته کړه، د آقا خان بنسټ په افغانستان کې په ۱۱ موسسو کې فعالیت کوي، چې شاوخوا لس زره کسان پکې په کار بوخت دي او په افغانستان کې شاوخوا شپږ میلیونه وګړي ترې ګټه پورته کوي. نوموړي پېښو ته د رسېدو په چارو کې د دولت له وزیر څخه د آقاخان د دفترونو سره د همکارۍ او ملاتړ غوښتنه وکړه.
په پاۍ کې دواړو لوریو د لا زیاتو همکاریو په اړه خبرې وکړې او پېښو ته د رسېدو په چارو کې د دولت وزیر ژمنه وکړه، چې د آقا خان د دفتر شته ستونزو او ننګونو ته به مناسبې حل لارې ومومي.
