له پېښو سره د مبارزې آمادګۍ ملي ادارې په انګړ کې د اورلګېدنې د مخنیوي دایمي کمېټې غونډه ترسره شوه
نن سهار، د یکشنبې په ورځ، د اور لګېدنې د مخنیوي دایمي کمېټې غونډه د خطر د مخنیوي او کمولو د رئیس ملا نورمحمد بدري په مشرۍ، د سوداګرۍ او صنایعو خونې، د نفتو او ګازو، اطفایې، افغان ملي بیمې، او د چارو د ادارې لوی ریاست د استازو په ګډون د دې ادارې په انګړ کې ترسره شوه.
یاده غونډه د قران کریم د څو مبارکو آیتونو په تلاوت سره پیل شوه.
د غونډې په پیل کې، د خطر د مخنیوي او کمولو رییس ملا نور محمد بدري د غونډې ګډونوالو ته ښه راغلاست وویل، او د غیر معیاري پمپ سټیشنونو د بندولو په اړه یې خبرې وکړې. ور پسې د غونډې هر ګډونوال د پمپ سټیشنونو د غیر معیاري والي او د هغې د مهر لاک کولو په اړه خپل نظرونه او حل لارې وړاندې کړې.
په پای کې جوړې شوې غونډې دا پرېکړه وکړه، چې د پمپ سټیشنونو د معیاري کولو لپاره باید ١٧ غیر معیاري پمپ سټیشنونه د کمېټې د هر غړي، امنیتي مسؤلینو او د رسنیو په شتون کې، راتلونکې دوشنبې ورځ مهر لاک شي. تر څو نور پمپ ستیشنونه معیاري او له خطرونو څخه یې مخنیوی وشي.
غونډه د خیر په دعا سره پای ته ورسېده.
نېټه: ١٤٤٦/١٠/١٥
له پېښو سره د مبارزې آمادګۍ ملي اداره
