له پېښو سره د مبارزې آمادګۍ ملي ادارې لوی رئیس د کندهار ولایت له پېښو سره د مبارزې آمادګۍ ریاست لپاره د نوې اداري ودانۍ د جوړېدو له کارونو څخه څارنه وکړه
نن ورځ چهارشنبه، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي کندهار ولایت ته د یو رسمي سفر په ترڅ کې د یاد ولایت له پېښو سره د مبارزې آمادګۍ ریاست لپاره د نوې جوړېدونکې اداري ودانۍ د کارونو له پرمختګ څخه د یو پلاوي ملتیا څارنه وکړه.
محترم ترابي صاحب په دې لیدنه کې له اړونده مسؤلینو څخه د اداري ودانۍ د پروژې په اړه راپور واخیست او ویې ویل چې، د ودانۍ کارونه له پلان سره سم پر مخ روان دي. هغه وویل چې د اداري ودانۍ جوړېدل د خدمتونو د وړاندې کولو په کیفیت مستقیم اغېز لري او د کیفیت, چټکتیا او شفافیت پر مراعتولو یې مسؤلینو ته لازمې سپارښتنې وکړې.
د یادونې وړ ده، چې له پېښو سره د مبارزې آمادګۍ ریاست اداري ودانۍ, چې درې پوړیزه ده او یوه زېرزمیني هم لري چې د معیاري ګدام لپاره کارول کېږي، د ۱۳ میلیونه افغانیو په ارزښت جوړېږي، چې تر دې دمه یې ٪۹۰ کارونه بشپړ شوي دي. دا ډول نورې ودانۍ په څلورو نورو ولایتونو خوست، میدان وردګ، کاپیسا او سمنگان کې هم جوړې شوې دي، چې تمه ده پر وخت د خدمتونو رسونې، رسیدنې او د پېښو مدیریت په برخه کې به اغېزناکې تمامې شي.
نېټه:۱۴۴۷/۷/۳ هــ ق
له پېښو سره د مبارزې آمادګۍ ملي اداره
