له پېښو سره د مبارزې آمادګۍ ملي ادارې لوی رئیس, د افغانانو لپاره د بشري او پرمختیایي مرستو د همغږۍ ادارې او یو شمېر نړیوالو او داخلي مرستندویو مؤسسو له مسؤلینو سره وکتل
نن ورځ یک شنبه، له پېښو سره د مبارزې آمادګۍ ملي ادارې لوی رئیس، الحاج ملا نورالدین ترابي، د افغانانو لپاره د بشري او پرمختیایي مرستو د همغږۍ ادارې د رئیسې اغلې نامیک حیدروف، د ناروې کمیټې د لوی رئیس، ښاغلي تاریا واټرډال او د بیلابیلو نړیوالو او داخلي مؤسسو له مسؤلینو سره د دې ادارې د نړیوالو اړیکو د رئیس, مولوي عبدالرحمن رحماني په شتون کې وکتل او د پېښو مدیریت اړوند پر موضوعاتو یې خبرې وکړې.
ترابي صاحب د ټولو همکارو مؤسسو مسؤلینو ته ښه راغلاست ووایه او د دې ادارې د فعالیتونو، لاسته راوړنو او راتلونکو پلانونو په اړه معلومات وړاندې کړل او ټینګار یې وکړ چې د مؤسسو ترمنځ منظمه همغږي کولای سي چي د بشري او پرمختیایي خدمتونو کیفیت او پایله لا پیاوړې کړي او په ځانګړي ډول زیانمنو کورنیو ته ژر مرستي ورسوي.
همدا راز ترابي صاحب زیاته کړل چي دا اداره په خپلو ټولو برخو کې کار او خدمت ته ژمنه ده، موږ او تاسو باید افغان ولس ته د خوراکي او غیر خوراکي توکو تر څنګ وقایوي پروژې هم پلي کړو تر څو په لږ مصرف د ډیر زیان مخه ونیسو او موږ ټولو مؤسیسو ته پوره ډاډ ورکوو چي ستاسو کارونه په هره اداره یا ولایت کې پاته وي موږ د اصولو په چوکاټ کې درسره همکاره یو.
ورسته د ټولو ګډونوالو مؤسیسو په استازیتوب د افغانانو لپاره د بشري او پرمختیایي مرستو د همغږۍ مرستيال ښاغلي حمیدالله احمدي د یادي ادارې د لوی رئیس او ټول کاري ټیم څخه مننه وکړل او وې وویل چې نړیوالې او داخلي مؤسسې د افغانانو د ملاتړ او د پېښو د مدیریت په برخه کې د یادي ادارې له همکارۍ راضي دي او غواړي چې دغه همکاري لا نوره تقویه سي، هغه زیاته کړه چې ګډ پلان، معلوماتي تبادله، او د خطرونو پر ضد وقایوي پروګرامونه د مرستو د ښه تطبیق لپاره بنسټیز ارزښت لري.
وروسته د ناروې کمیټې لوی رئیس، ښاغلي تاریا واټرډال د یادي ادارې د ټول کاري ټیم څخه ځانګړې مننه وکړه چې د یادي ادارې په کارونو کې پوره شفافیت راغلی دی او موږ د دې ادارې سره پوره همغږي لرو.
وروسته د ټولو مؤسسو استازو ژمنه وکړه چې دوی به د افغانانو د ژوند د ښه والي لپاره خپل تخنیکې او عملي ملاتړ دوامدار وساتي.
ناسته د ګډو همکاریو د لا پیاوړتیا، د راتلونکو ګډو پروګرامونو د تنظیم او د عملي چارو د همغږۍ په ټینګار سره پای ته ورسېده.
نیټه: ۱۴۴۷/۰۶/۰۹ هـ ق
له پېښو سره د مبارزې آمادګۍ ملي اداره
