له پېښو سره د مبارزې آمادګۍ ملي ادارې سرپرست د کاپیسا ولایت له پېښو سره د مبارزې آمادګۍ ریاست د اداري ودانۍ د جوړولو کار پرانست
نن ورځ د چهار شنبې په سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي کاپیسا ولایت ته د سفر پر مهال د یاد ولایت له پېښو سره د مبارزې آمادګۍ ریاست د اداري ودانۍ د جوړولو د کار په پرانست غونډه کې ګډون وکړ.
په دې پرانست غونډه کې د یاد ولایت والي قاري احسان الله بریال، له پېښو سره د مبارزې آمادګۍ رئیس مولوي محمد صابر احمد، د تدارکاتو آمر مولوي احمدشاه ذهین، او یو شمېر مشرانو او د سیمې خلکو شتون درلود.
ترابي صاحب جوړې شوې غونډې ته وویل چې نن موږ د کاپیسا ولایت له پېښو سره د مبارزې آمادګۍ ریاست د اداري ودانۍ د جوړولو کار, چې یوه عامه المنفعه پروژه ده، د ۱۳ میلیونه افغانیو په ارزښت پيلوو چې په ۶ میاشتو کې به بشپړ شي. او دا به درې پوړیزه اساسي ودانۍ وي, چې یوه برخه به یې د خوراکي او غیر خوراکي توکو د ګدام لپاره وي دویم پوړ به یې ۶ اطاقه دفترونه وي درېیم پوړ به یی هم ۶ خونې ولري چې ټولټال به د ۳۶۴ مربع په ځمکه کې د ۲۶ په ۱۴ متره په اړخونو سره دا ودانۍ جوړه شي, او دا ودانۍ به ۱۲ اطاقه دفترونه ولري.
همداراز ترابي صاحب زیاته کړه چې تېره اوونۍ مو د میدان وردګ ولایت له پېښو سره د مبارزې آمادګۍ ریاست د اداري ودانۍ د جوړولو کار پرانست او په راتلونکې کې به درې دا ډول نورې ودانۍ په درېیو ولایتونو خوست، کندهار او سمنګان کې جوړېږي, چی هغه به هم هره ودانۍ د ۱۳ میلیونه افغانیو په لګښت جوړه شي.
همدارنګه ترابي صاحب د یاد ولایت له والي او له پېښو سره د مبارزې آمادګی رئیس څخه یې وغوښتل چې د دې پروژې له کیفیت او د کار چټکتیا څخه څارنه وکړي.|
په همدې حال کې، د کاپیسا والي محترم قاري احسان الله بریال، له پېښو سره د مبارزې آمادګی ملی ادارې سرپرست ته د ښه راغلاست ویلو ترڅنګ، د یادې ادارې او د امارت اسلامي د مشرتابه هڅې وستایلې او ویې ویل چې د دې پروژې پلي کول د ټولنې د پرمختګ لپاره یو مهم ګام دی.
همداراز، له پېښو سره د مبارزې آمادګۍ رئیس مولوي محمد صابر احمد ژمنه وکړه چې د ودانۍ د جوړولو پر بهیر به جدي څارنه وکړي او د کار کیفیت ته به ځانګړې پاملرنه وکړي.
نیټه: ۱۴۴۶/۸/۲۰ هــ ق
له پېښو سره د مبارزې آمادګۍ ملي اداره
