له پېښو سره د مبارزې آمادګۍ ملي ادارې سرپرست د چین هېواد د ANDI شرکت له رئیس سره وکتل

نن سهار د پنجشنبې په ورځ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابی، د چین هېواد د ANDI شرکت له رئیس محمد عل‌الفتی او د دغه شرکت له استازو الحاج بلال او سید نظیم خلوتی سره په خپل کاري دفتر کې لیدنه او خبرې وکړې.
په دې لیدنه کې، د چین هېواد د ANDI شرکت استازو د خپل شرکت تخنیکي ظرفیتونه او امکانات، په ځانګړي ډول د بې‌پیلوټه الوتکو (ډرون) په برخه کې معرفي کړل او ویې ویل چې د دوی ډرونونه د ۵۰۰ کیلوګرامو او یا حتی د زیات بار د انتقال توان لري. دا ډرونونه کولای شي په بیړنیو حالاتو کې ټپیان او زیانمن شوي کسان له خطرناکو سیمو څخه خوندي سیمو ته ولیږدوي.
همداراز هغوی زیاته کړه، چې ANDI شرکت چمتو دی چې د ډرون کارونې، تخنیکي تجهیزاتو او د سټلایټ وسایلو په برخه کې هغه وسایل چې د یو کیلومتر په شعاع کې د اړیکو او انټرنېټ ته د لاسرسي زمینه برابروي، له پیښو سره دمبارزي آمادګۍ ملې اداری سره همکاري وکړي. هغوی وویل چې دغه تجهیزات د بیړنیو حالاتو پر مهال حیاتي او اساسي رول لوبوي. د شرکت استازو وویل چې چمتو دي دغه تجهیزات له پېښو سره د مبارزې آمادګۍ ملي ادارې په اختیار کې ورکړي او د لګښت ورکولو طریقه یې هم د بحث وړ کېدای شي.
په دوام کې، الحاج ملا نورالدین ترابی د ANDI چینایي شرکت له همکاریو او وړاندیزونو څخه مننه وکړه او ویې ویل چې په بیړنیو حالاتو کې د دغو تجهیزاتو کارونه ډېر اړین دي، او دا کولای شي د تلفاتو په راکمولو، زیانمنو سیمو ته د لومړنیو توکو د انتقال او د ټپیانو د ژغورنې په برخه کې مهم رول ولوبوي.
تـرابي صاحب زیاته کړه, چې افغانستان د خپل جغرافیایي موقعیت له امله د طبیعي پېښو سره مخ هېواد دی او لارې یې هم غرنۍ دي, چې زیانمنو ته د رسېدنې شرایط یې ستونزمن کړي او په دغو تجهیزاتو سره به موږ وکولای شو چې د پېښو په مدیریت کې وړتیاوې څو برابره کړو.
نوموړي هدایت ورکړ چې د دې ادارې او د ANDI چینایي شرکت له استازو څخه دې یو تخنیکي پلاوی جوړ شي، ترڅو د دغو تجهیزاتو ټول تخنیکي اړخونه او اغېزمنتیا په کره توګه وڅېړي او د ارزونې له پایلو سره سم دې وروستۍ پرېکړې وشي. او موږ به له پېښو سره د مبارزې آمادګۍ ملي ادارې په چوکاټ کې انشاالله ډېر ژر دا اسانتیا خپلو هېودالوالو ته چمتو کړو ترڅو موږ وکولای شو چې د پېښو په سیمو کې بند پاتې زیانمن خلک د ډرون طیارې له لارې وژغورو. همداراز بند پاتې پېښځپلو ته د ډرون طیارې له لارې اړینې لومړنۍ مرستې انتقال کړو.

نېټه: ۱/ ۱۲/ ۱۴۴۶ هـ ق
له پېښو سره د مبارزې آمادګۍ ملي اداره