له پېښو سره د مبارزې آمادګۍ ملي ادارې سرپرست د وچکالۍ ځپلو او له خطر سره د مخ خلکو د وضعیت د څېړنې لپاره د بادغیس ولایت دره بوم ولسوالۍ ته سفر وکړ
نن ورځ سه شنبه، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، په نخچرستان سیمه کې د وچکالۍ ځپلو او له خطر سره مخ د خلکو وضعیت او د هغوی لپاره د اوبو رسولو څرنګوالي د څېړنې په موخه، د یو پلاوي په مشرۍ د بادغیس ولایت دره بوم ولسوالۍ د نخچرستان سیمی ته سفر وکړ.
محترم ترابي صیب د سیمې له خلکو سره وکتل او اوبه یې د ژوند د اړتیاوو پوره کولو، د کرنې د ودې او د یوې سیمې د پرمختګ لپاره یوه اساسي اړتیا وبلله. هغه څرګنده کړه چې د نخچرستان سیمې ته د اوبو د لېږد لپاره موږ لازمې هڅې روانې کړی دی. چې د بالامرغاب له سیند څخه د دره بوم ولسوالۍ نخچرستان سیمې ته د اوبو لېږد په داسی ډول وکړو، چی د بالامرغاب د سیند څخه اوبه د سولر په ذریعه لوړو سیمو ته ولېږدوو او ټول هغه کلي چې وچکالۍ ځپلي دي د دغو اوبو څخه د پیپونو په ذریعه استفاده وکړي، موږ مخکی د ادارې له لوري د بادغیس ولایت له پېښو سره د مبارزې آمادګۍ رئیس په ګډون او د ولایت مقام، د کلیو د پراختیا ریاست او د اوبو او انرژۍ ریاست د استازو په همکارۍ یو څلور کسیزه پلاوی ټاکلی و او د ملګرو ملتونو د بشري مرستو د همغږۍ دفتر (OCHA) سره هم دا موضوع شریکه شوې ده، ترڅو د مؤسسو له لارې دې سیمې ته د اوبو د لېږد په برخه کې همکاري وکړي.
د یادونې وړ ده، چې اوبو ته د لاسرسي ښه والی، د کلیو په کچه له کډوالۍ څخه مخنیوی، د روغتیايي او ژوند شرایطو ښه والی، د څښاک اوبو ته ښه لاسرسی، د کرنې، مالدارۍ او د څارویو وضعیت ښه کېدل د دې پروژې له ګټو څخه دي.
نېټه: ۱۴۴۶/۱۲/۲۰ ه ق
له پېښو سره د مبارزې آمادګۍ ملي اداره
