له پېښو سره د مبارزې آمادګۍ ملي ادارې سرپرست د واش کلسټر له مرستیال سره وکتل
نن ورځ سې شنبه، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د واش کلسټر له مرستېال ښاغلي ایمانویل سره په خپل کاري دفتر کې وکتل او خبرې یې وکړې.
ښاغلي ترابي صاحب، د یاد کلسټر پلاوي ته د ښه راغلاست ترڅنګ وویل، چې د نن غونډه مو په دې موخه جوړ کړې ده چې د بادغیس ولایت د نخچرستان په سیمه کې خلک وچکالۍ ځپلي دي او باید ژر تر ژره د اوبو رسونې سیستم ورته جوړ شي.
همدا راز ترابي صاحب وویل، چې ما خپله د نخچرستان د سیمې څخه لیدنه کړې ده، چې هلته ۴۱ کلي دي چي ۲۷۵۰ کورنۍ کیږي او د وچکالۍ له سخت بحران سره مخ دي چې اوس د څښاک اوبه هم نه لري، نوموړي وویل چې موږ یو سروې کړې ده چې د بالامرغاب د رود څخه د سولر په واسطه اوبه پورته کړي او هلته یو لوی حوض ورته جوړ کړي تر څو د هغه حوض څخه اوبه یادو کلیو ته د پیپونو په ذریعه انتقال شي، چی اوس د باغیس ولایت د مقام د اوبو ټانکرونه هلته ورځي او د خلکو د اوبو اړتیا پوره کوي.
د واش کلسټر مرستېال ښاغلي ایمانویل د یادې ادارې د سرپرست څخه مننه وکړه او د واش کلسټر په اړه یې معلومات وړاندې کړل، چې واش کلسټر یو مستقل کلسټر دی چې د مؤسسو تر منځ همغږي رامنځ ته کوي او په ۸ زونونو کي یو یو نفر لري تر څو مؤسسه راجلب کړي.
همداراز ښاغلې ایمانویل وویل چي موږ به د نخچرستان ولسوالۍ د خلکو ستونزه له ډونرانو سره شریکه کړو تر څو ژر تر ژره یوه د حل لاره ورته پیدا کړو او موږ به د دغو وچکالۍ ځپلو خلکو لپاره یو مثبت خبر ولرو.
نېټه:۱۴۴۷/۲/۰۴ هــ ق
له پېښو سره د مبارزې آمادګۍ ملي اداره
