له پېښو سره د مبارزې آمادګۍ ملي ادارې سرپرست د جرمني د اسلپ خیریه بنسټ له رضاکارانو سره وکتل

نن ورځ د دوشنبې په سهار، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، په خپل کاري دفتر کې د جرمني د اسلپ خیریه بنسټ رضاکارانو، سرکان ایزه او مایکل سونر او د یاد بنسټ همغږي کوونکي نجیب الله سلیمان خیل سره د دې ادارې د نړیوالو اړیکو رئیس الحاج مولوي حافظ عبدالرحمن رحماني په حضور کې وکتل او خبرې یې وکړې.
په دې ناسته کې، الحاج ملا نورالدین ترابي د اسلپ خیریه بنسټ رضاکارانو ته د ښه راغلاست ویلو ترڅنګ په کندهار، بلخ او لوګر ولایتونو کې د بې وزلو خلکو لپاره د یاد بنسټ له مرستو مننه وکړه. هغه وویل چې موږ هغو خلکو ته چې ریښتیني مستحقین او زیات اړمن دي، د خیریه بنسټونو او موسسو په همکارۍ مرستې رسوو.
نوموړي د سروې او مرستو د وېش په پروسه کې د شفافیت ډاډ څرګند کړ او زیاته یې کړه چې موږ خیریه موسسو ته لازمې اسانتیاوې برابروو، ترڅو هغوی په ښه او چټک ډول اړمنو کسانو ته مرستې ورسوي.
ورپسې د جرمني اسلپ خیریه بنسټ رضاکارانو له پېښو سره د مبارزې آمادګۍ ملي ادارې له لوري د مرستو وېشلو لپاره د لازمې اسانتیاوو برابرولو څخه مننه وکړه او څرګنده یې کړه چې موږ ډاډه یو چې مرستې په شفافه پروسه کې ریښتیني مستحقینو ته رسېږي، او له همدې امله موږ د خپلو مرستو په دوام او زیاتوالي کې لیواله یو.
په پای کې دواړو خواوو اړمنو او له خطر سره مخ خلکو ته د مرستو رسولو په برخه کې پر لا زیاتو همکاریو ټینګار وکړ او د اسلامي امارت د اصولو په چوکاټ کې یې د دغو همکاریو د دوام ژمنه وکړه.

نېټه:۱۴۴۶/۶/۷
له پېښو سره د مبارزې آمادګۍ ملي اداره