له پېښو سره د مبارزې آمادګۍ ملي ادارې سرپرست د بدخشان ولایت یمګان ولسوالۍ ته سفر وکړ او له سېلاب ځپلو سره یې د غمشریکۍ ترڅنګ د (۱،۰۰۰،۰۰۰) یو میلیون افغانیو په ارزښت د وقایوي پروژې د تطبیقولو لپاره یو میلیون افغانۍ  منظورې کړې  

نن ورځ یکشنبه، له پېښو سره د مبارزې آمادګۍ ملي ادارې سرپرست؛ محترم الحاج ملا نورالدین ترابي د طبیعي پېښو له امله زیانمنو شویو ته د رسېدنې او د هغوی د خطرونو د کمولو د هڅو په دوام د یو پلاوي د مشر په توګه د بدخشان ولایت  څخه تر پنجشیر ولایت پوری د بهارک، جرم، یمګان او کران و منجان ولسوالیو ته سفر وکړ.
په دې سفر کې، ترابي صاحب د سېلابونو له امله د زیانمنو شویو سیمو لیدنه وکړه او له ځایي اوسېدونکو سره یې له نیږدې څخه خبرې وکړې. هغه د ځایي خلکو  قومي مشرانو ستونزې، غوښتنې او اړتیاوې واورېدې او بیا یې د یمګان په ولسوالۍ کې د قومي مشرانو سره د یو میلیون افغانیو مرسته وکړه, چې تاسو د بدخشان ولایت له پېښو سره د مبارزې آمادګۍ ریاست تر چتر لاندې د ولسوال صاحب په ملتیا په زیانمنو ځایونو کې چې هر ځای مناسب وي هغه پروژه په دې یو میلیون افغانیو تطبیق کړئ.   
له پېښو سره د مبارزې آمادګۍ ملي ادارې سرپرست قومي مشرانو او نورو غمځپلو ته وویل، چې دا اندازه مرسته که څه هم ستاسو ټولې اړتیاوې نه شي پوره کولای، خو  د عالیقدر امیر المؤمنین حفظه الله یو پيغام دا دی چې تاسو زموږ هیر شوي نه یاست او تاسو زموږ د پاملرنې په لومړیتوبونو کې شتون لرئ او موږ د مرکزي او نړیوالو بنسټونو سره په همغږۍ د نورو مرستو د کولو په هڅه کې یو.
په پای کې د یمګان ولسوالۍ اوسېدونکو د ترابي صاحب له دې مرستې او پوښتنې څخه مننه وکړه او زیانمنو شویو سیمو ته یې د ادارې د رهبرۍ پاملرنه اغېزمنه یاده کړه.
بیا ترابي صاحب سره د خپل پلاوی د بهارک، جرم، یمګان او کران و منجان د ولسوالیو د متضررینو ځایونو څخه لیدنه وکړه او له هغه وروسته نن د انجمن کوتل د لارې د پنجشیر  ولایت ته ورسېد.
د یادونې وړ ده، چې له پېښو سره د مبارزې آمادګۍ ملي اداره تل د زیانمنو شویو سیمو د پېژندلو، د خطرونو د کمولو، د خلکو د ځان او مال د خوندي ساتلو او د ټولنې د غښتلي کولو لپاره د اغېزمنو پروژو د تطبیقولو په هڅه کې ده.

نېټه: ۱۴۴۶/۱۲/۲۵ هـ ق
له پېښو سره د مبارزې آمادګۍ ملي اداره