له پېښو سره د مبارزې آمادګۍ ملي ادارې د پېښو له امله زيانمنو خلکو ته پر وخت د رسېدنې په موخه ۲۶ عرادی موټرونه له متحده عربي اماراتو څخه وپېرل او ولايتونو ته یې انتقال کړل

له پېښو سره د مبارزې آمادګۍ ملي ادارې د محترم مقام د وړاندیز او د عالیقدر امیرالمومنین حفظ الله د منظورۍ پر بنسټ، یادې ادارې ۲۶ عرادی موټرونه له متحده عربي اماراتو څخه وپېرل او د ګمرکي پړاوونو له بشپړېدو وروسته یې ولايتونو ته انتقال کړل.
په همدې تړاو، څه موده وړاندې د یادې ادارې د مالي او اداري عمومي رئيس  مولوی محمد علم عالميار په مشرۍ يو درې کسیز پلاوي متحده عربي اماراتو ته سفر وکړ او هلته يې ۲۶ عراده موټرونه وپېرل، چې ۲۳ عراده يې هایلکس، يو عراده لنډکروزر، يو عراده اسکواټور او يو عراده یې هم ډمپر موټر دی.
د یادونې وړ ده، چې نن ورځ دا موټرونه د اسلام قلعه بندر له لارې، د ګمرکي معافيت اسنادو له بشپړېدو او د ادارې د لوګو سټيکرونو له نصبولو وروسته اړوندو ولايتونو ته انتقال شول.
د یادونې ده، چې د دغو وسایطو په پېرودلو او ولايتونو ته د هغوی په لېږد سره به د هېواد په کچه په ولایتونو کې د پېښو د سروې او زيانمنو خلکو ته پر وخت رسېدنې په برخه کې لويې ستونزې حل شي، او د ادارې کارکوونکي به وکولای شي ژر تر ژره د پېښې سيمې ته ځان ورسوي او د پېښو له امله رامنځته شوې ستونزې به په اغېزمنه توګه مديريت کړي.
په همدې حال کې، د اړونده ولایتونو ډریوران چې د دغو موټرونو د انتقال لپاره اسلام‌قلعه ته راغلي وو، د یادو وسایطو په ترلاسه کولو سره یې مننه او خوښي وښوده او ویې ویل چې له دې وروسته به د دوی ټرانسپورټي ستونزې حل شي.

نېټه:۱۴۴۶/۱۰/۱۲
له پېښو سره د مبارزې آمادګۍ ملي اداره