له پېښو سره د مبارزې آمادګۍ ملي ادارې د ماینپاکۍ د انسجام او همغږۍ ریاست او د خوړو نړیوال پروګرام (WFP) ترمنځ د همغږۍ غونډه ترسره شوه
له پېښو سره د مبارزې آمادګۍ ملي ادارې د ماینپاکۍ د انسجام او همغږۍ ریاست او د خوړو نړیوال پروګرام (WFP) ترمنځ د همغږۍ غونډه د ماینپاکۍ د انسجام او همغږۍ رئیس، قاري نورالدین رستم خیل او د یاد دفتر د استازو په ګډون د یاد ریاست د غونډو په صالون کې ترسره شوه.
په غونډه کې د ماینپاکۍ پروګرام د تاریخچې، لاستهراوړنو، اوسني وضعیت، د ککړو سیمو د پاکولو په بهیر کې د موجودو ستونزو، طرزالعملونو او په پروژو کې د ماین پاکۍ فعالیتونو د الزاماتو په اړه له پېښو سره د مبارزې آمادګۍ ملي ادارې له لوري د متحدالمال لیک په اړه هر اړخیز معلومات وړاندې شول. همدارنګه ټینګار وشو چې د WFP په پروژو کې د ماینپاکۍ موضوعات باید لا هم پیاوړي او منسجم شامل شي.
د خوړو نړیوال پروګرام استازو هم د لا زیاتو همکاریو، د ککړو سیمو د پاکولو د بهیر د ښهوالي او د همغږۍ د پراختیا په تړاو خپلې پوښتنې او وړاندیزونه شریک کړل او د دواړو بنسټونو ترمنځ د همکارۍ پر پراختیا یې ټینګار وکړ.
په پای کې، دواړو خواوو د دوامدارو همکاریو، پر وخت د معلوماتو تبادلې او په ټولو پروژو کې د ماینپاکۍ د الزاماتو پر رعایت کولو ټینګار وکړ.
نېټه: ۱۴۴۷/۶/۱۲ هـ ق
له پېښو سره د مبارزې آمادګۍ ملي اداره
