له پېښو سره د مبارزې آمادګۍ ملي ادارې د مالي او اداري نوی عمومي رئیس معرفی او کار یې پیل کړ
له پېښو سره د مبارزې آمادګۍ ملي ادارې د مالي او اداري نوی عمومي رئیس معرفی او کار یې پیل کړ
کابل- د ربیع الاول ۶-۱۴۴۶
محترم مولوي محمد علم عالمیار د افغانستان اسلامي امارت د ریاست الوزراء عالي مقام د ۲/۳/۱۴۴۶ نېټې د ۱۰۴۰ ګڼې حکم پر بنسټ نن سهار له پېښو سره د مبارزې آمادګۍ ملي ادارې د مالي او ادارې نوی عمومي رییس په توګه د دې ادارې رئیسانو او کارکونکو ته د یو لړ مراسمو په ترڅ کې معرفي شو او کار یې پیل کړ.
د معرفي کېدو په مراسمو کې چې د دې ادارې د غونډو په تالار کې ترسره سول، د ننګرهار ولایت د علماوو شورا مشر شیخ مولوي حسن جان ووېل: امانت خپل اهل ته سپارل د اسلام مقدس دین له ځانګړتیاوو څخه دی او هر چا ته چې مسؤلیت سپارل کېږي دا یو امتیاز نه بلکه امانت دی او نوموړي مولوي محمد علم عالمیار یو وړ کس وباله. همدارنګه شیخ صاحب د دیني او عصري زده کړو پر اهمیت باندې په خبرو سره د دې ادارې نوي ټاکل شوي مالي او اداري عمومي رئیس د جهادي کړنو په اړه یادونه وکړه او هغه ته یې له خدای ج څخه په ښه توګه د سپارل شوي مسؤلیت ترسره کولو په برخه کې د توفیق غوښتنه وکړه.
ورته مهال د ملي دفاع وزارت د ساختماني چارو رئیس شیخ مولوي ګل محمد، په خپلو خبرو کې په نیکو کارونو کې د یو بل سره مرسته کول اړین وباله او د دې ادارې له کارکونکو څخه یې وغوښتل چې د نوي ټاکل شوي د مالي او اداري عمومي رییس سره په ګډه کار وکړي ترڅو د خلکو ستونزو ته په وخت سره رسېدنه وشي.
د دې غونډې په پای کې د مالي او اداري نوی عمومي رئیس خپل کاري دفتر ته معرفي او کار یې پیل کړ.
