له پېښو سره د مبارزې آمادګۍ ملي ادارې د اطلاعاتو او عامه اړیکو نوی رئیس وټاکل شو
نن سهار (شنبه)، حافظ محمد یوسف حماد له پېښو سره د مبارزې آمادګۍ ملي ادارې د سرپرست په وړاندیز او د افغانستان اسلامي امارت د ریاست الوزراء عالي مقام د حکم پر بنسټ، د یادې ادارې د اطلاعاتو او عامه اړیکو د رئیس په توګه وټاکل شو.
په همدې مناسبت جوړه شوې غونډه کې، نوموړی د مقام د دفتر رئیس مولوي فضلباري جواد او د مقام د دفتر د انسجام او همغږۍ آمر عبدالرب مبارک لخوا کارکوونکو ته معرفي شو او رسماً یې خپل کار پيل کړ.
د مقام د دفتر رئیس، اداري بدلونونه او تبدیلي په امارتي ادارو کې یو اصل وباله او حافظ محمد یوسف حماد ته یې د اطلاعاتو اوعامه اړیکو د رییس په توګه د نوې دندې مبارکي وویله. نوموړي ټینګار وکړ چې یاده اداره د امارت په چوکاټ کې د پېښو وقایه، د خطرونو کمولو، زیانمنو ته رسېدنه او د بیا رغونې په برخو کې د فعالیتونو د همغږۍ او انسجام مسؤلیت لري. همداراز، هیله یې څرګنده کړه چې د اطلاعاتو او عامه اړیکو د نوي رئیس په شتون سره به د دې برخې فعالیتونه لا اغېزناک شي.
ورپسې، حافظ محمد یوسف حماد د افغانستان اسلامي امارت د مشرتابه او له پېښو سره د مبارزې آمادګۍ ملي ادارې د سرپرست له باور څخه مننه وکړه او ژمنه یې وکړه چې خپلې دندې به په پوره همکارۍ او مسؤلیت سره ترسره کوي.
همداراز، له پېښو سره د مبارزې آمادګۍ ملي ادارې د سرپرست په لارښوونه، تاج محمد همت د اطلاعاتو او عامه اړیکو د آمر، او عطا محمد معمارزاده د عامه پوهاوي د ویډیوګانو جوړولو د عمومي مدیر په توګه وټاکل شول.
نېټه:۱۴۴۶/۹/۱۵
له پېښو سره د مبارزې آمادګۍ ملي اداره
