له پېښو سره د مبارزې آمادګۍ ملي ادارې او MCPA موسسې ترمنځ د ١٥٩,٣٥٥ ډالرو په ارزښت د ګډو همکاریو تفاهم نامه لاسلیک شوه
نن ورځ پنجشنبه له غرمې مخکې، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د (MCPA) ماین پاکۍ د پلان جوړونې موسسې د پروګرامونو له مرستیال، محمد اکرم امیري سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
په دې کتنه کې، ترابي صاحب ښاغلي امیري ته ښه راغلاست ووایه او ویې ویل، چې د دې ادارې د کارونو یوه مهمه برخه د ماین پاکۍ د چارو همغږي ده او خوښ یم، چې نن ورځ په همدې برخه کې تفاهم نامه لاسلیک کوم. نوموړي ډاډ ورکړ، چې د لغمان ولایت له پېښو سره د مبارزې آمادګۍ ریاست ته به له یادې موسسې سره د همکارۍ په موخه لازمې لارښوونې وکړي.
په همدې حال کې، د ماین پاکۍ د پلان جوړونې موسسې د پروګرامونو مرستیال، محمد اکرم امیري له پېښو سره د مبارزې آمادګۍ ملي اداره کې د موسسو لپاره له شته آسانتیاوو څخه خوښي څرګنده کړه او ویې وویل، چې د دغه ادارې د سرپرست په همکارۍ موږ وکولای شول چې د دغې پروژې اداري چارې د تفاهم نامې د لاسلیک کولو تر پړاوه ورسوو.
په وروستیو کې، دواړو لوریو ترمنځ د ١٥٩,٣٥٥ ډالرو په ارزښت د ګډو همکاریو تفاهم نامه لیک لاسلیک شوه، چې له مخې به یې یاده موسسه ۳,٦۰۰,٠٠٠ متره مربع ځمکه، چې پخوا د لغمان ولایت د مرکز مهترلام په شامتي کلي کې د ناټو د ځواکونو د روزنیز مرکز په توګه کارول کېده، د ناچاوده توکو له پاتې شونو څخه پاکه کړي.
نېټه: ١٤٤٦/١١/۱۷ ـ ق
له پېښو سره د مبارزې آمادګۍ ملي اداره
