له پېښو سره د مبارزې آمادګۍ ملي ادارې او د DRC  مؤسسې ترمنځ د ۱،۲۲۶،۳۰۳ ډالرو په ارزښت د ګډو همکاریو تفاهم نامه لاسلیک شوه 

 نن ورځ سه  له غرمې مخکې، له پېښو سره د مبارزې آمادګۍ ملي ادارې سرپرست؛ محترم الحاج ملا نورالدین ترابي، د ډنمارک د کډوالو ټولنې (DRC) مؤسسې د ماین پاکۍ پروګرامونو له رئیسې؛ اغلې حنا روز هالوي او مل پلاوي سره په خپل کاري دفتر کې وکتل او د ګډو همکاریو تفاهم‌نامه یې ورسره لاسلیک کړه.
له هرڅه مخکې، ترابي صاحب د یادې مؤسسې راغلي پلاوي ته ښه راغلاست وویل او زیاته یې کړه، چې په او سني وضعت کې د افغانستان خلک تر بل هر وخت ډېر بشري مرستو ته اړتیا لري، نو له همدې امله زموږ له ملي او نړیوالو مؤسسو او بنسټونو څخه غوښتنه ده، چې هغوی ته پر وخت او شفاف ډول مرستې ورسوي.
ورپسې، د ډنمارک د کډوالو ټولنې مؤسسې رئیسې؛ اغلې هالوي له محترم ترابي صاحب څخه د وخت ورکولو په پار مننه وکړه او د خپلې پروژې په اړه یې په تفصیل سره معلومات وړاندې کړل، همدارنګه یې زیاته کړه، چې موږ به خپله پروژه په پوره روڼتیا او چټکتیا سره ترسره کوو.  
 د یادونې وړ ده، چې په پای کې د دواړو لوریو تر منځ ټولټال د یو میلیون، دوه سوه او شپږویشت زره او درې سوه او درې (۱،۲۲۶،۳۰۳) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د کندهار ولایت په ۱۳ بېلابېلو ولسوالیو کې، ټولټال ۴۷۸،۸۶۸ متره مربع سیمه د په لاس جوړ شویو ماینونو څخه پاکه شي، چې له امله به یې ۱،۸۰۴ وګړي په مستقیم او ۵،۰۳۲ وګړي په غیر مستقیم ډول ګټه اخیستونکي شي او همدارنګه د یاد ولایت د سپین بولدک ولسوالۍ په صفري نقطه کې به ۲۵۰،۰۰۰، ته د EORE ټیمونو لخوا د ماینونو او ناچاودو توکو په اړه د عامه پوهاوي پروګرامونه په لاره واچول شي او د یاد ولایت په بېلابېلو ولسوالیو کې به د ماینونو او ناچاودو توکو له امله ۸۰ تنه قربانیانو ته نغدي مرستې ووېشل شي او همداراز، د کندهار ولایت د بېلابېلو ولسوالیو اړمنو ته ، د چاودېدونکو توکو او د طبیعي پېښو له امله زیانمنو شویو او دې ولایت ته راستنېدونکو له ۴۰۰ څخه زیات وګړو ته به د هغوی د عایداتي سرچینو او ټولنیز ملاتړ په برخو کې مرستې ترسره شي. 

نېټه: ۱۴۴۷/۱/۱۲ هـ ق
له پېښو سره د مبارزې آمادګۍ ملي اداره