له پېښو سره د مبارزې آمادګۍ ملي ادارې او د کډوالۍ نړیوال سازمان (IOM) ترمنځ د رضاکارو ټیمونو جوړولو په موخه تخنیکي غونډه ترسره وشوه
پرون سهار د چهارشنبې په ورځ، له پېښو سره د مبارزې آمادګۍ ملي ادارې او د کډوالۍ نړیوال سازمان (IOM) تر منځ تخنیکي غونډه د یادې ادارې په انګړ کې ترسره شوه. د دې ناستې موخه د رضاکارو ټیمونو د جوړولو بهیر ارزونه، د ملاتړ کوونکو پالیسیو تدوین او د دې طرحې د پلي کولو لپاره د اړینو مرستو جلبول و.
په دې غونډه کې د کارکوونکو چارو رئیس، مولوي محمد عابد نعماني، د بهرنیو اړیکو آمر، برهانالدین خان او له پېښو سره د مبارزې آمادګۍ ملي ادارې یو شمېر آمرینو، همداراز د کډوالۍ نړیوال سازمان لخوا د خطرونو د کمولو مسئول اشرف السحر او د اړیکو مسئول عبدالوارث القاسم ګډون کړی و.
د ناستې اصلي بحثونه د بېړنیو حالاتو پر مهال په ځواب وینه کې د رضاکارو ټیمونو مهم رول، د خلکو له وړتیاوو څخه اغېزناکه ګټه اخیستنه او د داخلي او نړیوالو ادارو تر منځ د همغږۍ اړتیا ته ځانګړي شوي وو.
له پېښو سره د مبارزې آمادګۍ ملي ادارې استازو د رضاکارو ټیمونو د جوړولو پر اړتیا ټینګار وکړ او د دې پروګرام د پلي کولو لپاره یې د نړیوالو ادارو د تخنیکي او مالي ملاتړ غوښتنه وکړه.
په مقابل کې، د کډوالۍ نړیوال سازمان مسئولانو هم د یادې طرحې ملاتړ وکړ او ژمنه یې وکړه چې موضوع به له ډونرانو سره شریکه کړي او د مالي سرچینو د جلبولو لپاره به هڅې وکړي.
د غونډې په پای کې، دواړو خواوو د دوامداره ناستو، ګډو همکاریو، او د طبیعي پېښو پر وړاندې د اغېزناکې ځواب وینې لپاره د تفاهم او د دې پروګرام د مالي ملاتړ لپاره یې ژمنتیا وښوده.
نېټه: ۱۴۴۶/۱۲/۰۸ هـ ق
له پېښو سره د مبارزې آمادګۍ ملي اداره
