د کندهار ولایت په معروف ولسوالۍ کې د سېلابونو د مخنیوي په موخه د یو محافظوي دېوال د جوړولو چارې پیل شوې
د کندهار ولایت له پېښو سره د مبارزې آمادګۍ ریاست، د یاد ولایت د معروف ولسوالۍ په ګړنګ اډزو کلي کې د سېلابونو له امله د رامنځته کېدونکو خطرونو د مخنیوي په موخه د یو محافظوي دېوال د جوړولو کار په رسمي ډول پیل کړ.
یاده پروژه د ۶۰۰ مترو په اوږدوالی او د ۲ مترو په لوړوالي او ټولټال د دوه سوه شپېته زره (۲۶۰،۰۰۰) افغانیو په لګښت د ګړنګ په سېلابي مانده کې پلې شوه. د پروژې د پرانستنې مراسمو کې د معروف ولسوالۍ مرستیال محترم حافظ قدرتالله، د استخباراتو ریاست استازي، د قومندانۍ مسؤلین، مجاهدین، علماي کرام او د سیمې یو شمېر مشرانو او مخورو ګډون درلود.
د پرانیستنې مراسم د قرآن عظیمالشان د مبارکو آیتونو په تلاوت سره پیل شول. وروسته، د کندهار ولایت له پېښو سره د مبارزې آمادګۍ ریاست د وقایې او خطر کمولو انجنیر د مقدماتي وینا پر مهال د پروژې په اړه هراړخیز او بشپړ معلومات وړاندې کړل او له اړوندو ادارو او مسؤلینو یې وغوښتل چې د دې پروژې په بریالي پلي کولو کې دې لازمه همکاري وکړي.
ورپسې، د معروف ولسوالۍ مرستیال ولسوال ګډونوالو ته د ښه راغلاست ویلو تر څنګ، د کندهار ولایت له پېښو سره د مبارزې آمادګۍ ریاست څخه د دې پروژې د عملي کېدو له امله مننه وکړه او ډاډ یې ورکړ چې د ولسوالۍ اداره به د پروژې د پلي کولو پر مهال بشپړه همکاري ولري. نوموړي همدارنګه په راتلونکي کې د ورته عامالمنفعه پروژو د پلي کولو غوښتنه وکړه.
په پای کې، مراسم د دعا په ویلو سره پای ته ورسېدل او د محافظتي دیوال د جوړولو عملي چارې په رسمي ډول پیل شوې.
د یادونې وړ ده، چې د دې محافظتي دیوال له بشپړېدو سره به د ګړنګ اډزو کلي، د استخباراتو ریاست، د ولسوالۍ مقام او د معروف ولسوالۍ بازار د روان کال د بارانونو او سېلابونو له احتمالي خطرونو څخه خوندي شي.
نېټه: ۱۴۴۷/۰۷/۲۱ هــ ق
له پېښو سره د مبارزې آمادګۍ ملي اداره
