د پکتیکا او خوست زلزلې ځپلو سره د چین ولسي جمهوریت د غیرخوراکي توکو مرسته وکړه
کابل- د چنګاښ ۸مه-۱۴۰۱
په هېواد کې زلزلې ځپلو سره د مرستو په دوام، نن د چین هېواد د بشري مرستو ۶ الوتکې کابل ته را ورسېدې.
د دې مرستو د سپارلو په پروګرام کې غلام غوث ناصري د پېښو ته د رسېدو وزارت عمومي رییس او سرپرست په دې شرایطو کې د افغانستان لپاره د چین ولسي جمهوریت بشري مرستې مهمې وګڼلې او وویل: دغه مرستې به په شفافه توګه د پکتیکا ولایت برمل او ګیان او د خوست ولایت سپېرې ولسوالیو زلزلې ځپلو ته ووېشل شي. نوموړۍ همدارنګه د کورونو د بیا رغونې په برخه کې له نړیوالې ټولنې او په ځانګړي توګه د چین ولسي جمهوریت څخه د همکاري غوښتونکۍ شو.
په دوام کې وانګ یو، د چین ولسي جمهوریت فوق العاده او تام الاختیار سفیر، د زلزلې ځپلو سره د خواخوږۍ ترڅنګ، چین او افغانستان دوه ملګري هیوادونه وګڼل او وویل: د چین هیواد په ۶ الوتکو کې ۹۸۰ خیمې، ۳۲۰ چپرکټونه او له ۶۰۰۰ زرو څخه زیاتې کمپلې د زیانمن شویو سره مرسته وکړه. نوموړي وویل چې دغه مرستې بسنه نکوي او په نږدې راتلونکي کې به د افغانستان خلکو سره لا زیاتې بشري مرستې ترسره شي.
ښاغلي وانګ یو زیاته کړه: ۸۰۰۰ ټنه خوراکي توکي چې د چین ولسي جمهوریت ژمنه کړې وه، د افغانستان اسلامي امارت ته ورکړل شوي.
