د ننګرهار ولایت له پېښو سره د مبارزې آمادګۍ ریاست د ګبیوني دیوالونو د جوړېدو له پروژو  څخه څارنه وکړه

د ننګرهار ولایت له پېښو سره د مبارزې آمادګۍ ریاست, د یاد ولایت د بټي‌کوټ ولسوالۍ په اړوندو سیمو کې د ګبیوني دیوالونو د جوړېدو له درېیو پروژو  څخه څارنه وکړه. دا پروژې د کډوالۍ نړیوال سازمان (IOM) په مالي ملاتړ پلي کېږي، چې موخه یې د طبیعي پېښو په ځانګړي ډول د سیلابونو له خطرونو څخه د هستوګنیزو کورونو او کرنیزو ځمکو ساتنه ده.
دا ګبیوني دیوالونه چې ټولټال ۵۲۳ متره اوږدوالی لري. تر اوسه یې ۸۵ سلنه کارونه بشپړ شوي، او تمه ده چې تر راتلونکو لسو ورځو به یې کارونه بشپړ او ګټې اخېستنې ته وسپارل شي.
د دې پروژو د پلي کېدو پر مهال لسګونو ماهرو او غیر ماهرو کاریګرو ته د کار زمینه برابره شوې، چې د سیمې پر اقتصادي وضعیت یې مثبته اغېزه کړې ده.
همداراز، د پروژو له بشپړېدو وروسته به سلګونه جریبه کرنیزه ځمکه او هستوګنیز کورونه د سیلابونو له احتمالي خطرونو څخه خوندي پاتې شي.
د ننګرهار ولایت له پېښو سره د مبارزې آمادګۍ ریاست مسؤلین وايي چې د یادو پروژو پلي کېدل له نږدې څاري، ترڅو چارې یې په کره ډول او د اړتیا سره سمې ترسره شي.

نېټه: ۱۴۴۶/۱۰/۱۴ هــ ق
له پېښو سره د مبارزې آمادګۍ ملي اداره