د فراه ولایت له پېښو سره د مبارزې آمادګۍ ریاست په فراهرود ولسوالۍ کې د ګبیوني او استنادي دیوالونو جوړولو د پروژې کار پیل کړ
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د فراه ولایت له پېښو سره د مبارزې آمادګۍ ریاست، د فراهرود ولسوالۍ د چکاب سیمې په کاریز نو او لنډي کاریز کلیو کې د ګبیوني او استنادي ديوالونو جوړولو د پروژې کار رسمآ پیل کړ.
په دې پروژه کې، په کاریز نو کلي کې د ۵۰ متره په اوږدوالي او ۲ متره پلنوالي یو ګبیوني دیوال او په لنډي کاریز کلي کې د ۹۰ متره په اوږدوالي او ۲ متره پلنوالي یو استنادي دېوال جوړیږي، چې په ټولیز ډول ۱۴۰ متره اوږدوالی او ۴ متره پلنوالی لري. د پروژې د بنسټ کیندنې چارې د درنو ماشینونو (اسکواټور) په وسیله له پېښو سره د مبارزې ولایتي کمېټې د غړو په شتون کې پیل شوې.
دا پروژه له پېښو سره د مبارزې آمادګۍ ادارې له لوري د یو لک (۱۰۰,۰۰۰) افغانیو په لګښت تمویلېږي. د فراه ولایت له پېښو سره د مبارزې آمادګۍ ریاست مسؤلین وایي، د دې پروژې اساسي موخه د سیلابونو له امله د رامنځته کېدونکو زیانونو مخنیوی، د خلکو د ځان او مال ساتنه، د کرنیزو ځمکو خوندیتوب او د قدرتي پېښو پر وړاندې د زیانمنو سیمو د زیانمننې کچې راکمولو ته زمینه برابرول دي.
مسؤلینو زیاته کړه چې د دې ډول وقایوي پروژو پلي کول د طبیعي پېښو له امله د مالي او ځاني زیانونو په کمولو کې مهم رول لري او د عامه شتمنیو، زیربناوو او د خلکو د اقتصادي سرچینو د خوندي ساتلو لپاره اغېزمن ګام بلل کېږي. د سیمې اوسېدونکو هم د دغې پروژې له پیل څخه خوښي څرګنده کړې او دا یې د سیلابونو د خطرونو پر وړاندې د خپلو کلیو د لا زیات خوندیتوب لپاره یو مهم او اغېزناک اقدام بللی دی.
نېټه: ۱۴۴۷/۱۲/۲۹ هـ ق
له پېښو سره د مبارزې آمادګۍ اداره
