د سرپل ولایت له پېښو سره د مبارزې آمادګۍ ریاست ۲۳۵۸ زیانمنو کورنیو ته خوراکي مرستې ووېشلې
له پېښو سره د مبارزې امادګۍ ادارې او د ماهو مؤسسې ترمنځ د لاسلیک شوي هوکړهلیک پر بنسټ، چې د پروژې مالي ملاتړ یې د خوړو نړیوال پروګرام (WFP) له لوري کېږي، د سرپل ولایت له پېښو سره د مبارزې آمادګۍ ریاست د یادې مؤسسې په تخنیکي همکارۍ، د دغه ولایت د بلخاب ولسوالۍ په پنځو بېلابېلو سیمو کې ۲۳۵۸ زیانمنو کورنیو ته خوراکي مرستې ووېشلې.
په دې بهیر کې، له سروې وروسته او د اړوندو مسئولینو په شتون کې، هرې کورنۍ ته دوه بورۍ ۲۵ کیلویي اوړه، ۵ لېټره غوړي، ۶.۳ کیلو دال او نیم کیلو مالګه ووېشل شوه.
د مرستو ترلاسه کوونکو کورنیو د دغو مرستو له ترلاسه کولو څخه خپله خوښي څرګنده کړه او د سرپل ولایت له پېښو سره د مبارزې امادګۍ ریاست، د خوړو نړیوال پروګرام (WFP) او د ماهو مؤسسې څخه یې د زیانمنو کورنیو د پر وخت ملاتړ او رسېدنې له امله مننه او قدرداني وکړه.
نېټه: ۱۴۴۸/۲/۱۴ هـ ق
له پېښو سره د مبارزې آمادګۍ اداره
