د افغان بېځایه شویو او راستنېدونکو د ستونزو لپاره د پایداره حل لارو د پیداکولو اړوند مشورتي ناسته ترسره شوه
نن ورځ د پنج شنبې په سهار، له پېښو سره د مبارزې آمادګۍ ملي ادارې او د رها مؤسسې په کوربه توب د افغان بېځایه شویو او راستنېدونکو د ستونزو لپاره د پایداره حل لارو د پیداکولو اړوند مشورتي غونډه ترسره شوه، چې پکې د افغانستان د اسلامي امارت د بېلابېلو وزارتونو، ادارو او یو شمېر مؤسسو استازو شتون درلود.
د غونډې ګډونوالو په خپل وار سره د افغان بېځایه شویو او راستنېدونکو ستونزو ته رسېدنه او د هغې لپاره د مناسبو حل لارو د پیدا کولو په اړه خپلې خبرې وکړې او همدارنګه د ناستې په لړ کې په افغانستان کې د شته طبیعي پېښو لکه وچکالۍ، زلزلې او سېلابونو یادونه هم وشوه او د هغې د احتمالي خطرونو د کمولو لپاره هریو ګډونوال معلومات وړاندې کړل او په یاده برخه کې یې د بهرنیو مرستو نظم او ترتیب مهم وباله.
په پای کې، د یادو ستونزو د له منځه وړلو لپاره د بهرنیو بنسټونو د مرستو په پوره همغږۍ په پراختیایي پروژو لګولو، په اړوندو ادارو کې د مسلکي کسانو د ګمارلو او د کارکوونکو د ظرفیت لوړونې برخې په اړه د پوره پاملرنې په اړه ټینګار وشو.
نېټه: ۱۴۴۷/۶/۲۷ هـ ق
له پېښو سره د مبارزې آمادګۍ ملي اداره
