۴۰۰ بېوزله او زیانمن شویو کورنیو په کابل کې خوراکي او غیر خوراکي توکي ترلاسه کړل
کابل- د سلواغې ۱۸مه ۱۴۰۰
د کابل ولایت پېښو سره د مبارزې ریاست، نن د محترم مولوي شرف الدین مسلم، د پېښو ته د رسېدو په چارو کې د دولت وزارت د پېښو چارو د همغږۍ مرستیال په ګډون ۴۰۰ بېځایه شویو، زیانمنو او بېوزله کورنیو ته په کابل ولایت کې خوراکي او غیر خوراکي توکي ووېشل.
د پېښو چارو د همغږۍ مرستیال د دغو مرستو د وېش په پروګرام کې وویل چې په تېرو اونیو کې په بېلابېلو ولایتونو کې زیات شمېر هیوادوالو ته د هغوۍ اړتیا ته په کتو بېړنۍ مرستې وېشل شوي دي. همدارنګه هغه زیاته کړه چې نن ۴۰۰ کورنیو ته خوراکي مرستې چې ۵۰ کیلو وریجې، ۵۰ کیلو غنم، د ماشومانو خواړه او غیر خوراکي توکي چې ترپال، د اوبو سطل، چریکي بستره او روغتیایي توکي د کابل ولایت د پېښو سره د مبارزې ریاست لخوا ووېشل شول.
ښاغلي مسلم څرګنده کړه چې مستحقینو او زیانمنو ته د مرستو او سروې لړۍ هره ورځ په ولایتو کې روانه ده او مرستې له تبعیض پرته په یو ډول وېشل کېږي.
ورته مهال د دغو مرستو ترلاسه کونکو د پېښو چارو ته د رسېدنې وزارت څخه د دغو مرستو د وېش په پار مننه وکړه او د دغه شان پروګرامونو د دوام غوښتونکي شول.
