کندز ولایت ته پېښو ته د رسېدو په چارو کې د دولت وزارت مرستیال سفر؛ په کندز ښار کې ۱۲۳۰ کورنیو خوراکي او غیر خوراکي توکي ترلاسه کړل

کندز- د وړي ۱۱مه- ۱۴۰۱
محترم مولوي شرف الدین مسلم پېښو ته د رسېدو په چارو کې د دولت وزارت مرستیال، د هیواد شمال ته په خپل سفر کې کندز ولایت ته ولاړ او د دولتي ادارو غړو، د یاد ولایت د پېښو سره مبارزې رییس او ورسره پلاوي په ګډون یې په کندز ښار کې ۱۲۳۰ زیانمن شویو او اړمنو کورنیو ته د خوراکي او غیر خوراکي توکو د وېش لړۍ پیل کړه.
د دغو مرستو د وېش په پروګرام کې، د پېښو وزارت مرستیال د ا.ا.ا د مشرتابه د هیلو په څرګندولو سره د پېښو ته د رسېدو په چارو کې د دولت وزارت د ژمنې پر بنسټ وویل: موږ نن کندز ته راغلي یو ترڅو ستاسې ستونزې او ننګونې واورو او هغوۍ ته یوه مناسبه حل لاره پیدا کړو.
د پېښو وزارت مرستیال وویل چې دغو کورنیو له دقیقې سروې وروسته، خوراکي او غیر خوراکي مرستې چې اوړه، وچې شیدې، مُۍ، بسکیټ او مایع ګاز په کې شامل دي ترلاسه کړل.
محترم مولوي شرف الدین زیاته کړه چې دغه مرستې به د کندز ولایت سربېره په نورو ولایتونو کې هم زیانمن شویو او اړمنو کورنیو ته ووېشل شي.
د یادونې وړ ده چې پېښو ته د رسېدو په چارو کې د دولت وزارت مرستیال د خلکو ستونزو اوریدو او هغوۍ ته د رسېدنې په پار بلخ، جوزجان، سرپل, فاریاب، سمنګان او کندز ولایتونو څخه لیدنه کړې او د خوراکي او غیر خوراکي توکو د وېش لړۍ یې هغوۍ ته پیل کړي ده.