په هلمند ولایت کې څو په لاس جوړ شوي ماینونه کشف او خنثی شول
د هلمند ولایت له پېښو سره د مبارزې آمادګۍ ریاست د هیلو ټرسټ نړیوالې مؤسسې عملیاتي ټیمونو د همغږۍ له مخې وکولای شول چې د لښکرګاه ښار د څلورمې امنیتي حوزې په سیمه کې څو په لاس جوړ شوي ماینونه وپېژني او خنثی یې کړي.
یاد ماینونه چې د ښاریانو ژوند ته یې جدي ګواښ پېښ کړی و، د تخنیکي ارزونو له بشپړېدو وروسته او د خوندیتوب د ټولو اصولو په رعایتولو سره په خوندي ډول له منځه یووړل شول. دغه عملیات پرته له هر ډول ځاني تلفات او مالي زیان څخه ترسره شول.
د هلمند ولایت له پېښو سره د مبارزې آمادګۍ ریاست د تخنیکي ټیمونو له هڅو او د همکارو بنسټونو له همکارۍ څخه د قدردانۍ کولو تر څنګ، له ټولو هېوادوالو غوښتنه وکړه، چې له جګړو څخه د پاتې شونو هر ډول چاودېدونکو توکو، ماینونو یا مشکوک شیانو د لیدلو په صورت کې دې، ژر تر ژره له اړوندو ادارو سره اړیکه ونیسي، چې تر څو یې د احتمالي خطرونو مخه ونیول شي.
نیټه: ۱۴۴۷/۰۸/۰۱ هـ ق
له پېښو سره د مبارزې آمادګۍ ملي اداره
