په نیمروز ولایت کې د اجباري اېستل شویو راستنېدونکو لپاره د یو معیاري پنډغالي د جوړولو چارې په چټکۍ سره روانې دي
د نیمروز ولایت له پېښو سره د مبارزې آمادګۍ ریاست، په اجباري توګه د اېستل شویو کډوالو وضعیت ته د اغېزناکه، چټکې او منظمې رسېدنې په موخه، په دغه ولایت کې د یو معیاري او مجهز پنډغالي د جوړېدو چارې پیل کړې دي. یاد پنډغالی له پېښو سره د مبارزې آمادګۍ ملي ادارې د سرپرست، محترم الحاج ملا نورالدین ترابي، د لارښوونې له مخې، په پرلهپسې او جدي ډول د پرمختګ په حال کې دی.
دا پڼډغالی د پل ابریشم په ستراتیژیکه سیمه کې جوړېږي، او اساسي موخه یې له ګاونډیو هېوادونو څخه اجباري راستنېدونکو کډوالو ته د یوه لنډمهال، خوندي او مجهز ځای برابرول دي. د دې پنډغالي د جوړېدو په پلان کې د کډوالو ټولې بېړنۍ او لومړنۍ اړتیاوې په پام کې نیول شوي، چې د تشنابونو، حمامونو، د څښاک د اوبو سیستم، برېښنايي تاسیساتو، صحي کلینیک، جومات او نورو حیاتي خدمتونو جوړول او تجهیز پکې شامل دي.
له پېښو سره د مبارزې آمادګۍ ملي اداره، د تېرو بریالیو تجربو په ځانګړي ډول د تورخم د معیاري پنډغالي د جوړولو له تجربې څخه په استفادې، هڅه کوي چې دا مرکز هم د ټولو اړینو اسانتیاوو لرونکی وي او د راستنېدونکو لومړنۍ اړتیاوې پوره کړي.
له پېښو سره د مبارزې آمادګۍ ملي اداره تل هڅه کوي، ترڅو خپلو هغو هېوادوالو ته چې له ګاونډیو هېوادونو څخه بېرته خپل هېواد ته راستانه کېږي، لازمې اسانتیاوې برابرې کړي.
نېټه: ۱۴۴۷/۰۱/۱۰ هـ ق
له پېښو سره د مبارزې آمادګۍ ملي اداره
