له پېښو سره د مبارزې آمادګۍ ملي ادارې سرپرست په کابل کې د رضاکارانو ورکشاپ پرانست

نن د شنبې ورځ، په کابل کې د رضاکارانو ورکشاپ، له پېښو سره د مبارزې آمادګۍ ملي ادارې په نوښت او د آغا خان پرمختيايي شبکې (AKDN) په همکارۍ، د ادارې سرپرست الحاج ملا نورالدين ترابي او د AKDN سفير ډاکټر نجم‌الدين نجم په شتون کې پرانيستل شو.
ښاغلې ملا نورالدين ترابي وويل،  چي دا پروګرام د کابل او ولايتونو په کچه د طبيعي پېښو پر وړاندې د چټکې او اغېزمنې ځواب وينې لپاره جوړ شوی دي او په راتلونکي کې به نورو ولايتونو ته هم وغځول شي. نوموړي زياته کړه، دغه ټيمونه به د پېښو منفي اغېزې کمې او د مرستو بهير منظم کړي، چې دا د ټولنيز يووالي او مقاومت لپاره مهم ګام دی.
دغه رضاکاران به د پېښو د معلوماتو ورکولو او لومړنيو مرستو رسولو په برخو کې فعاليت کوي، چې موخه يې د عامه پوهاوي لوړول او د زيانونو کمول دي.
د AKDN سفير ډاکټر نجم وويل، دوی د پېښو د مديريت وړتيا لوړولو لپاره له دې ادارې سره نږدې همکاري لري او دا نوښت يې د چټکې ځواب وينې لپاره مهم بللی. هغه ژمنه وکړه چې AKDN به د رضاکارو ټيمونو په روزنه او ملاتړ کې برخه واخلي او هيله‌مند دی چې دا پروژه به د نورو ولايتونو لپاره بېلګه شي.
په پای کې، دواړو خواوو ژمنه وکړه چې همکاري به دوامداره پياوبړي او په نورو ولايتونو کې به ورته ټيمونه جوړ کړي.

نېټه: ۱۴۴۷/۲/۸ هـ ق  
له پېښو سره د مبارزې آمادګۍ ملي اداره